Ny Fomba Ahitan’ny Kintan-dranomasina

TENA mahavariana ny akoran’ny karazana kintan-dranomasina (kiririndolo) iray, izay fahita any amin’ny haran-dranomasina. Misy lopy kely be dia be mirafitra eo amin’ny akorany, ka toy ny hoe maso ny akorany manontolo.

Diniho izao: Nandinika ny taolan-tanan’io kintan-dranomasina io ny mpahay siansa, ka nahita “kristaly be dia be mivohitra sy mifanetinety, izay mbola manify noho ny singam-bolo.” (Tantaran’ny Zavaboary, anglisy) Vita amin’ny karazana sokay ireo kristaly, izay tsy inona fa lopy bitika tena arifomba. Izy ireo no mampita ny hazavana any amin’ireo sela mpandray hazavana, izay ao ambanin’ireo taolan-tanana. Tena mety tsara ny paozin’ireo lopy ireo, ka afaka mamoaka tsara ny sary hitan’ilay biby.

Mahavita karazan’asa roa ny akoran’ilay kintan-dranomasina. Hoy i Joanna Aizenberg, mpahay simia: “Mampiseho zavatra fahita eo amin’ny zavamananaina izany: Natao hahavita asa maromaro ny zavatra iray, matetika.”

Naka tahaka an’io kintan-dranomasina io ny mpikaroka, ka nanamboatra lopy bitika be dia be tamin’ny sokay. Tsotra ny manao izany ary tsy mandany vola. Azo ampiasaina amin’ny fifandraisan-davitra, ohatra, ireny lopy ireny, mba hampitana hazavana amin’ny kabla natao ho amin’izany.

Ahoana ny hevitrao? Vokatry ny evolisiona (na fiovana miandalana) ve ny fomba ahitan’ny kintan-dranomasina, sa nisy namorona?