Toe-tsain’ity Tontolo Ity

Nahoana isika no tokony hitandrina mba tsy hanana ny toe-tsain’ity tontolo ity?

1 Jaona 5:19: “Izao tontolo izao manontolo kosa eo ambany fahefan’ilay ratsy.” (I Satana no mampiely ilay toe-tsaina mibaiko ny eritreritra sy ny ataon’ny olona tsy manompo an’i Jehovah. Miely toy ny rivotra io toe-tsaina io, ary mahatonga azy ireo ho tia tena sy hihevi-tena ho ambony. Tokony hitandrina mafy àry isika mba tsy hamela azy io hamolavola ny saintsika.)

Apok. 12:9: “Natsipy mafy ilay dragona lehibe, ilay menarana tany am-boalohany, ilay antsoina hoe Devoly sy Satana, izay mamitaka ny tany rehetra misy mponina. Natsipy mafy tamin’ny tany izy, ary ny anjeliny koa niara-natsipy taminy.” (Nihamafy ny fitaoman’i Satana sy ny demoniany, taorian’ny nandraisan’ny Fanjakan’Andriamanitra fahefana tamin’ny 1914. Lasa tia tena sy mahery setra kokoa ny olona, noho ny toe-tsaina aelin’i Satana. Terena mafy ho anisan’ity tontolo ity ireo te hanompo an’i Jehovah, ary terena hanao ny fanaon’ny besinimaro sy hiala amin’ny fivavahana marina.)

Inona avy no mampiavaka ny toe-tsain’ity tontolo ity?

1 Kor. 2:12: “Fa isika tsy nandray ny fanahin’izao tontolo izao, fa ny fanahy avy amin’Andriamanitra, mba hahafantarantsika ny zavatra nomen’Andriamanitra antsika tamin-katsaram-panahy.” (Raha toa ny fanahy na ny toe-tsain’ity tontolo ity ka mahazo vahana ao amin’ny eritreritry ny olona iray sy ny faniriany, dia ho hita eo amin’izay ataon’ilay olona izany. Tokony hialany àry ireo fanao sy fanaranam-po tsy mendrika ny Kristianina, raha tiany ny hanaisotra izany toe-tsaina izany. Tokony havelany hibaiko ny toe-tsainy koa ny fanahin’Andriamanitra, ary tokony hiezaka ho tia ny fitsipiny izy. Tsara hotadidina izany eo am-pandinihana ireto lafiny mampiavaka ny toe-tsain’ity tontolo ity ireto.)

Manao izay tiana fotsiny, fa tsy miraharaha ny sitrapon’Andriamanitra

Nampirisihin’i Satana hanapa-kevitra samirery momba izay tsara sy ratsy i Eva. (Gen. 3:3-5; mifanohitra amin’ny voalazan’ny Ohabolana 3:5, 6.) Tsy mahalala ny sitrapon’Andriamanitra sady tsy te hahalala izany, ny olona maro manao toa an’i Eva. Manao izay tiany fotsiny izy ireo. Mila mitandrina àry ny olona mahalala izay takin’Andriamanitra sy miezaka manao izany, sao ho voataonan’ny toe-tsain’ity tontolo ity ka hinia tsy hiraharaha ny torohevitry ny Baiboly momba izay heveriny fa ‘zavatra madinika.’—Lioka 16:10; jereo koa ny hoe “Fahaleovan-tena.”

Mihevi-tena ho ambony

I Satana no voalohany nihevi-tena ho ambony ka nanjary simba ny fony. (Ampitahao amin’ny Ezekiela 28:17; Ohabolana 16:5.) Lasa voazarazara izao tontolo izao, satria misy mihevi-tena ho ambony kokoa noho ny olona avy amin’ny firazanana, firenena, fiteny, ary saranga hafa. Mila manaisotra tanteraka izany toe-tsaina izany na dia ny mpanompon’Andriamanitra aza. Mila mitandrina koa izy ireo sao mihevi-tena ho ambony ka hiziriziry amin’ny heviny na dia amin’ny zavatra madinika aza, na koa tsy hiaiky fahadisoana na tsy hanaiky torohevitra ka tsy handray soa avy amin’ny fanampian’i Jehovah amin’ny alalan’ny fandaminany.—Rom. 12:3; 1 Pet. 5:5.

Mikomy amin’ny fahefana

I Satana (midika hoe “Mpanohitra”) no nikomy voalohany. Nikomy tamin’i Jehovah koa i Nimroda (midika hoe “Andao Hikomy”), ka nasehony fa zanak’i Satana izy. Tsy manohitra ny mpitondra fanjakana kosa ny olona matahotra an’Andriamanitra satria tsy tia mikomy. (Rom. 13:1) Manaiky ny fahefan’ny ray aman-dreniny koa ny ankizy tsy tia mikomy. (Kol. 3:20) Ary tsy tian’ny mpanompon’i Jehovah ny miaraka amin’ny mpivadi-pinoana, izay tsy manaja ny mpiandraikitra voatendrin’i Jehovah ao amin’ny fandaminany.—Joda 11; Heb. 13:17.

Manaram-po amin’ny fanirian’ny nofo

Hita sy re hatraiza hatraiza ny fitaomana hanao izany, ka mila mitandrina foana isika. (1 Jaona 2:16; Efes. 4:17, 19; Gal. 5:19-21) Mety hahazo vahana ao amin’ny olona iray ny eritreri-dratsy sy ny fanirian-dratsy, ka hiseho amin’ny resaka sy vazivazy ataony izany, amin’ny hira henoiny, ny dihy ataony, ary ny filma vetaveta jereny. Misy koa midoroka zava-mahadomelina, na mimamo, manitsakitsa-bady, mijangajanga, ary misy lehilahy miray amin’ny lehilahy na vehivavy miray amin’ny vehivavy. Misy indray misaraka amin’ny vadiny mba hanambadiana olon-kafa, na dia tsy ara-baiboly aza ny antony isarahany.—Mal. 2:16.

Irina ho azo daholo izay hitan’ny maso

Nataon’i Satana nitsiry tao am-pon’i Eva ny faniriana toy izany, ka nahatonga an’i Eva hanimba ny fifandraisany tamin’Andriamanitra. (Gen. 3:6; 1 Jaona 2:16) Nanda mafy ny fakam-panahy toy izany anefa i Jesosy. (Mat. 4:8-10) Mila mitandrina ireo te hampifaly an’i Jehovah, sao ho voasariky ny dokam-barotra hanana fanirian-dratsy toy izany. Mety hiala amin’ny finoana ka hijaly mafy ireo voafandrik’izany faniriana izany.—Mat. 13:22; 1 Tim. 6:7-10.

Mampideradera fananana sy zava-bita

“Avy amin’izao tontolo izao” koa izany, ka tsy tokony hataon’ny mpanompon’Andriamanitra. (1 Jaona 2:16) Manambony tena mantsy ny olona manao izany. Tsy manatanjaka ny finoan’ny hafa izany, fa vao mainka kosa mandrisika azy hanangon-karena sy hiezaka ny ho tafita eto amin’ity tontolo ity.—Rom. 15:2.

Miteny ratsy sy mahery setra rehefa tezitra

“Asan’ny nofo” izany, ary maro ny olona tsy maintsy miady mafy mba tsy hanao izany. Afaka mandresy an’izao tontolo izao sy ny toe-tsainy anefa izy ireo, raha tena mino an’Andriamanitra sy ampian’ny fanahiny.—Gal. 5:19, 20, 22, 23; Efes. 4:31; 1 Kor. 13:4-8; 1 Jaona 5:4.

Mametraka ny fanantenana amin’izay vitan’ny olombelona, sy matahotra olona

Izay hita maso sy azo tsapain-tanana ihany no zava-dehibe amin’ny olona araka ny nofo. Mitoky amin’ny fampanantenan’ny olona izy, ary matahotra olona. Mila vonjy amin’ny mpitondra olombelona izy, ary diso fanantenana rehefa tsy mahomby ireny. (Sal. 146:3, 4; Isaia 8:12, 13) Aminy dia tsy misy afa-tsy izao fiainana izao. Matahotra ny ho faty koa izy. (Mifanohitra amin’izay voalazan’ny Matio 10:28; Hebreo 2:14, 15.) Hery vao kosa no mibaiko ny sain’ny olona mahalala an’i Jehovah. Ny fampanantenan’i Jehovah no mameno ny sainy sy ny fony, ary mitady vonjy aminy izy isaky ny mila fanampiana.—Efes. 4:23, 24; Sal. 46:1; 68:19.

Mivavaka amin-javatra sy amin’olona, fa tsy amin’Andriamanitra

Voajanahary amin’ny olombelona ny mivavaka. Ampirisihin’i Satana, “andriamanitr’ity tontolo ity”, hivavaka amin-javatra na amin’olona anefa izy ireo, fa tsy amin’Andriamanitra. (2 Kor. 4:4) Misy mpitondra atao toy ny andriamanitra kely mihitsy. (Asa. 12:21-23) Olona an-tapitrisany no miankohoka amin’ny sampy. An-tapitrisany maro koa no manindrahindra mpilalao sarimihetsika sy mpanao fanatanjahan-tena malaza. Anindrahindrana olona tafahoatra koa ny fety sasany. Mila mitandrina isan’andro àry izay tena tia an’i Jehovah sy te hanompo azy irery ihany, sao ho voataona hanao toy izany koa.