Fifandraisana An-taratasy

NAHATONGA ny fiainana sy ny fitondran-tenan’ny olona an-tapitrisany maro ho tsara kokoa ny taratasy. Taratasy ny ankamaroan’ireo boky ao amin’ny Soratra Grika Kristianina, tany am-boalohany. Manoratra taratasy isika amin’izao andro izao, noho ny antony maro: hilazana sy hahazoana vaovao amin’ny namana, hampaherezana ireo vao tonga mpino na ireo rahalahy sy anabavy vao nahazo andraikitra manokana, sy hanatanjahana ireo izay misetra zava-tsarotra, ary hampitana fanazavana ilain’ny fiangonana.—1 Tes. 1:1-7; 5:27; 2 Pet. 3:1, 2.

Fomba fitoriana mandaitra koa ny fanoratana taratasy. Any amin’ny toerana sasany, dia mety hisy trano be tsy azo idirana na tanàna kely sarotra aleha, ka tsy ahafahantsika mitory. Tsy ao an-tranony ny olona sasany amin’ny ankabeazan’ny fotoana, ka tsy hitantsika, rehefa mitory isan-trano isika. Ny hafa mipetraka any amin’ny toerana mitokana.

Mety ho voatery hijanona ao an-trano ianao indraindray noho ny aretina, ny andro ratsy na ny antony hafa. Mety ho afaka hanoratra taratasy ve ianao amin’izay, mba hanohizana ny fitoriana nataonao tamin’ny havana iray na ny olona iray nanaovana fitoriana tsy ara-potoana? Nifindra trano ve ny iray tamin’ireo olona nampianarinao ny Baiboly? Angamba taratasy iray avy aminao no hany ilainy mba hihazonana ny fahalianany ara-panahy. Na angamba koa ianao afaka mandefa taratasy misy teny ara-baiboly ho an’ireo izay vao nanambady, niteraka na namoy hava-malala.

Fitoriana an-taratasy

Rehefa manoratra mba hitory amin’ny olona mbola tsy hitanao ianao, dia ampahafantaro aloha ny tenanao. Hazavao fa manao asa an-tsitrapo atao maneran-tany ianao. Lazao fa Vavolombelon’i Jehovah ianao, raha hitanao fa mety. Ampahafantaro an’ilay olona hoe nahoana ianao no manoratra fa tsy mandeha mitsidika azy. Manorata toy ny hoe mifanatri-tava amin’ilay olona ianao. Na izany aza, araka ilay toromarika hoe “hendre tahaka ny menarana, ary morà tahaka ny voromahailala”, dia eritrereto tsara ny habetsahan’ny zavatra hampahafantarinao momba ny tenanao.—Matio 10:16.

Soraty ao amin’ilay taratasy izay ho nolazainao tamin’ilay olona, raha afaka nitsidika azy ianao. Azonao ampiasaina ny fampidiran-dresaka iray ao amin’ny boky Fanjohian-kevitra, na ny fomba fampiseho hevitra ara-baiboly iray tao amin’ny Fanompoantsika Ilay Fanjakana vao haingana. Afaka mametraka fanontaniana iray ianao, sy mampirisika ilay olona hieritreritra momba azy. Ny mpitory sasany dia manazava fotsiny fa manana fandaharana maimaim-poana hamaliana fanontaniana ara-baiboly isika, ary avy eo izy dia manonona ny lohateny sasany ao amin’ny iray amin’ireo boky fianarantsika. Misy taratasy fanaovana fitoriana omena ho modely eo amin’ny pejy faha-73. Mety hanome hevitra anao izy io, nefa tsara raha ovaovana izay raketiny. Raha tsy izany, dia mety hahazo taratasy mitovy foana ny olona.

Misy olona tsy tia mamaky taratasy lava avy amin’ny olona tsy fantany. Koa mety ho fahendrena àry ny manoratra taratasy fohy. Aza atao lava loatra ny taratasinao, sao hamizana ilay andefasanao azy. Tsara raha ampiarahinao amin’ny taratasy fanasana ho amin’ireo fivoriana any amin’ny Efitrano Fanjakana ny taratasinao. Raha heverinao fa mety, dia mandefasa taratasy mivalona, bokikely, na Ny Tilikambo Fiambenana na Mifohaza! iray, ary hazavao fa afaka mahazo azy ireo tsy tapaka izy, raha tiany. Na anontanio izy raha azo atao ny mitsidika azy any an-tranony, mba hiresahana aminy misimisy kokoa.

Teny kely momba ny fanoratana taratasy

Jereo ilay taratasy modely. Mariho izao manaraka izao: 1) Madio sy milamina izy io, fa tsy mikorontana. 2) Na dia very aza ilay valopy, dia mbola manana ny anarana sy ny adiresin’ilay mpandefa ihany ilay andefasana. 3) Voalaza amin’ny fomba tsotra sy mivantana ao amin’ny fehintsoratra voalohany ny anton’ilay taratasy. 4) Hazavaina ao amin’ny fehintsoratra iray miavaka ny hevi-dehibe tsirairay avy. 5) Rehefa heverina ny anton’ilay taratasy, dia tsy fomba fiteny eo amin’ny olona mifankazatra be, na fomba fiteny fatra-panaja be, no ampiasaina.

Ny taratasy ofisialy kokoa, toy ny taratasy alefan’ny mpitan-tsoratry ny fiangonana ho an’ny biraon’ny sampana, dia tokony hisy ny anaran’ilay fiangonana, ary koa ny anaran’ilay mpitan-tsoratra sy ny adiresiny, ary ny daty. Tokony hatao ao koa ny anarana sy ny adiresin’ilay olona na fikambanana anoratana. Arahina teny fiarahabana mifanentana amin’ny anton’ilay taratasy izany. Ho famaranana ilay taratasy, amin’ny fiteny sasany, dia misy teny fanehoana fanajana na firarian-tsoa, alohan’ny sonia. Tokony hatao sora-tanana ilay sonia.

Ao amin’ny taratasy rehetra, na inona izany na inona, dia hamarino fa tsy misy diso ny tsipelina, ny fitsipi-panoratana, ny mari-piatoana, ary koa madio sy milamina ilay izy. Hahatonga ny taratasinao sy ny hafatra raketiny ho mendrika izany.

Aza hadinoina mihitsy ny manisy adiresin’ny mpandefa eo amin’ny valopy, ny adiresinao no tsara indrindra. Raha heverinao fa tsy ho fahendrena ny hanomezana ny adiresinao, rehefa mitory an-taratasy amin’ny olona tsy fantatrao ianao, dia anontanio ireo anti-panahy raha hekeny ny hampiasanao ny adiresin’ilay anti-panahy fandefasana ny taratasin’ny fiangonanareo. Tsy tokony hampiasaina amin’izany na oviana na oviana ny adiresin’ny Fikambanan’ny Vavolombelon’i Jehovah, satria izany dia hahatonga hevi-diso hoe ny biraon’ny Fikambanana no nandefa ny taratasinao, ary hiteraka fisafotofotoana. Raha tsy misy adiresin’ny mpandefa, nefa misy boky na gazety ao anatin’ilay valopy, izany koa dia mety hahatonga hevi-diso hoe ny Fikambanana no nandefa azy.

Aza hadinoina ny manisy hajia ampy vidy tsara, indrindra fa raha asianao boky na gazety ilay valopy. Tadidio fa any amin’ny tany maro, dia lafo kokoa noho ny amin’ny taratasy tsotra ny hajia tsy maintsy aloa, rehefa asiana bokikely na gazety ilay valopy.

Ny fomba fiteny tsara

Raha vao vitanao ny taratasinao, dia vakio mba hanamarinana izay nosoratanao. Manao ahoana ny famakianao azy? Maneho hatsaram-panahy sy fahaiza-manaja ve ilay izy? Ny fitiavana sy ny hatsaram-panahy no anisan’ny toetra iezahantsika haseho, rehefa mifandray amin’ny hafa isika. (Gal. 5:22, 23) Koa raha voamarikao fa misy fomba fiteny tsy dia mahafinaritra na maneho tsy fahafaliana, dia ahitsio ilay fomba filazanao zavatra.

Tonga any amin’ny toerana tsy tonganao ny taratasy. Izany fotsiny dia efa mahatonga azy io ho fitaovana manan-danja eo amin’ny fanompoana. Koa satria misolo tena anao sy ny zavatra misy vidiny aminao ny taratasinao, dia asio fiheverana izay lazainy, sy ny fisehony ary ny fihetseham-po ampitainy. Mety ho izy io no hany ilaina mba hitondrana olona iray ho eo amin’ny lalan’ny fiainana, na mba hanatanjahana na hampaherezana azy.