Valin’ireo Fanontanianareo

◼ Inona no tokony hotadidintsika ao an-tsaina rehefa manoratra taratasy ho an’ny tompon-trano izay tsy hitantsika ao an-trano isika?

Noho ny antony maro isan-karazany, dia hitantsika fa mihasarotra ny mifandray amin’ny olona rehefa mitsidika ny tokantranony isika. Nahita ny mpitory sasany fa fomba iray azo ampiharina mba hahatratrarana azy ireny ny fanoratana taratasy. Na dia afaka manome vokatra tsara aza izany, dia ilaina ny mandinika fampahatsiahivana sasany izay afaka manampy antsika hanalavitra zava-manahirana sasany:

Aza mampiasa ny adiresin’ny Fikambanana eo amin’ny adiresin’ny mpandefa. Tsy hety ny hanondroana fa nalefa avy tamin’ny biraontsika ilay taratasy, ka hahatonga zava-manahirana tsy ilaina ary indraindray fandaniana amboniny.

Ataovy azo antoka fa marina ny adiresin’ilay tompon-trano ary ampy ny hajia.

Aza atao hoe “Izay Mipetraka Ato” eo amin’ny adiresy; mampiasà anarana voafaritra tsara.

Aza mamela taratasy eo am-baravarana rehefa tsy misy na iza na iza ao an-trano.

Ny tsara indrindra dia taratasy fohy. Ampidiro ao ny taratasy mivalona na gazety iray, toy izay hiezaka hanoratra hafatra lava.

Tena mora vakina kokoa ny taratasy nosoratana tamin’ny milina fanoratana sady mahatonga ilay olona hanana fiheverana tsara anao.

Tsy isaina ho fiverenana mitsidika ny taratasy raha tsy efa nitory tamin’ilay olona ny tenanao teo aloha.

Raha manoratra ho an’ny olona iray izay efa nampiseho fahalianana ianao, dia tokony hanome adiresy na nomeraon’ny telefaonina mba hahafahany hifandray aminao. Hazavao ny fandaharam-pampianarana Baiboly ataontsika.

Manolora fanasana ho amin’ireo fivorian’ny kongregasiona eo an-toerana. Omeo ny adiresy sy ny oran’ireo fivoriana.

Aza manohy mandefa taratasy any amin’ireo tsy tratra an-trano rehefa avy namerina ny faritany ianao; ny mpitory izay manana an’ilay faritany amin’izao fotoana izao no tompon’andraikitra amin’ny fiasana azy io.