Fahaizana Mampiditra Andininy

NY SORATRA Masina no iorenan’ny fampianarana omena any amin’ireo fivoriantsika. Ireo andinin-teny ao amin’ny Baiboly koa no fototr’izay lazaintsika eny amin’ny fanompoana. Raha tiantsika hanatsara ny famelabelarantsika anefa izy ireny, dia mila mahay mampiditra azy ireny isika.

Tsy ampy ny manonona fotsiny ilay andininy sy manasa ny hafa hiara-mamaky azy io aminao. Rehefa mampiditra andinin-teny ianao, dia iezaho hotratrarina ireto zava-kendrena roa ireto: 1) Mba ho tsy andrin’ny mpihaino ny famakiana azy, sy 2) mba hifantohana amin’ny antony ampiasanao ilay andininy. Fomba isan-karazany no azo ampiasaina mba hahatratrarana izany.

Mametraha fanontaniana. Mandaitra indrindra io, raha mbola tsy miharihary amin’ny mpihaino ny valiny. Amboary ny fomba hilazanao ilay fanontaniana, mba hahatonga ny olona hieritreritra. Nanao izany i Jesosy. Nanatona azy tao amin’ny tempoly ireo Fariseo indray mandeha, ka nitsapa azy ampahibemaso momba ny fomba fahazoany ny Soratra Masina. Hoy i Jesosy tamin’izy ireo: “Ahoana no hevitrareo ny amin’i Kristy? Zanak’iza moa Izy?” Namaly izy ireo hoe: “Zanak’i Davida.” Nanontany indray àry i Jesosy hoe: “Koa nahoana ary Davida amin’ny Fanahy no manao Azy hoe ‘Tompo’?” Avy eo, dia nanonona ny teny ao amin’ny Salamo 110:1 izy. Tsy nahateny ireo Fariseo. Ny vahoaka anefa nihaino an’i Jesosy tamim-pahafinaretana.—Matio 22:41-46.

Eny amin’ny fanompoana, rehefa hampiditra andinin-teny, dia mampiasà fanontaniana toy izao: “Samy manana anarana na izaho na ianao. Mba manana anarana ve Andriamanitra? Hahita ny valin’izany isika ao amin’ny Salamo 83:18.” “Hisy fitondram-panjakana tokana ho an’ny olombelona rehetra ve, indray andro any? Mariho ny valin’izany ao amin’ny Daniela 2:44.” “Tena miresaka momba ny toe-piainana amin’izao androntsika izao tokoa ve ny Baiboly? Jereo izay lazain’ny 2 Timoty 3:1-5, ary ampitahao amin’ny toe-piainana fahitanao andavanandro.” “Hisy farany ve ny fahoriana sy ny fahafatesana, indray andro any? Hitantsika ao amin’ny Apokalypsy 21:4, 5 ny valiny omen’ny Baiboly.”

Ao amin’ny lahateny iray, ny fahaiza-mampiasa fanontaniana mba hampidirana andinin-teny dia hahatonga ny mpihaino hijery ireo andinin-teny ireo amin’ny endriny vaovao, ary na dia ireo efa fantany tsara aza. Hanao izany ve anefa izy ireo? Mety hanao izany izy ireo, raha ataonao mahakasika azy tsara ny fanontaniana apetrakao. Na dia mahaliana ny mpihaino aza ilay foto-kevitra, dia mety hiriorio ny sainy, rehefa mamaky andinin-teny efa reny imbetsaka ianao. Mba hisakanana an’izany àry, dia eritrereto tsara izay hahatonga ny famelabelaranao hanintona.

Milazà zava-manahirana iray. Milazà zava-manahirana iray, ary sariho ny sain’ny mpihaino ho amin’ny andinin-teny iray mety hanome ny vahaolana. Aza avela hanantena hahazo mihoatra noho izay voalaza ao anefa izy ireo. Matetika no tsy ilay vahaolana manontolo no omen’ny andinin-teny iray. Kanefa, asao ny mpihaino hijery, eo am-pamakianao ilay andinin-teny, hoe inona no toro lalana omen’izy io mba handaminana ilay zava-manahirana.

Na milazà fitsipika ara-pitondran-tena iray. Avy eo dia mampiasà fitantarana ara-baiboly iray, mba hampisehoana fa fahendrena ny fanarahana ilay fitsipika. Raha misy hevitra roa (na mahery) mifandray amin’ilay foto-kevitra resahina, ao amin’ny andinin-teny iray, dia manasa ny mpihaino hanamarika azy ireny ny mpandahateny sasany. Raha toa sarotra loatra amin’ny mpihaino sasany ny zava-manahirana iray, dia ampirisiho izy hieritreritra, amin’ny filazana safidy maromaro. Ilay andininy sy ny fampiharana azy avy eo no avelao hanome ny valiny.

Ny Baiboly no tonòny ho fahefana azo ekena. Raha efa liana amin’ilay foto-kevitrao ny mpihaino, ary nilaza hevitra iray na roa momba azy io ianao, dia azonao atao fotsiny ny mampiditra andinin-teny iray toy izao: “Mariho izay lazain’ny Tenin’Andriamanitra momba io hevitra io.” Mampiseho izany hoe nahoana ilay zavatra hovakinao no azo ekena.

Nampiasa lehilahy toa an-dry Jaona, Lioka, Paoly ary i Petera mba hanoratra ny Baiboly i Jehovah. Mpanoratra ihany anefa ireo, fa i Jehovah no Loharanon’ny Baiboly. Rehefa miresaka amin’ny olona tsy mpianatra ny Soratra Masina indrindra ianao no hahita fa tsy tena manan-kery ny filazana hoe “Nanoratra toy izao i Petera” na hoe “Nilaza toy izao i Paoly”, tsy toy ny filazana hoe “Hoy ny tenin’Andriamanitra.” Tsara homarihina fa indraindray dia nasain’i Jehovah i Jeremia mba hanomboka ny fanambarany tamin’ny hoe: “Mihainoa ny tenin’i Jehovah.” (Jer. 7:2; 17:20; 19:3; 22:2) Na mampiasa ny anaran’i Jehovah isika na tsia, rehefa mampiditra andinin-teny, dia tokony hitadidy hilaza amin’ny faran’ilay fanazavana, fa izay voalaza ao amin’ny Baiboly dia tenin’i Jehovah.

Jereo ny teny manodidina. Tokony hasianao fiheverana aloha ny teny manodidina ny andinin-teny iray, vao mampiditra azy ianao. Indraindray, dia hanonona mivantana ilay teny manodidina ianao; kanefa, mety hanova ny fomba hampidiranao ilay andininy izy io. Ohatra, hitovy ve ny fomba hampidiranao ny teny nolazain’i Joba, izay natahotra an’Andriamanitra, sy ny teny nataon’ny iray tamin’ireo nisandoka ho mpampionona azy? Nosoratan’i Lioka ny bokin’ny Asan’ny Apostoly. Manonona tenin’olon-kafa koa anefa izy ao, toa an-dry Jakoba, Petera, Paoly, Filipo, Stefana, ny anjely ary koa i Gamaliela sy ny Jiosy hafa tsy kristianina. Iza àry no holazainao fa nilaza ilay teny hotononinao? Tadidio koa, ohatra, fa tsy i Davida no nanoratra ny salamo rehetra, ary tsy i Solomona no nanoratra ny bokin’ny Ohabolana manontolo. Fantaro koa hoe iza ilay iresahan’ilay mpanoratra, sy hoe inona ilay foto-kevitra resahiny.

Resaho ny toe-javatra nanoratana ilay andininy. Mandaitra indrindra izany, raha asehonao fa mitovy amin’ireo toe-javatra resahinao ny toe-javatra nisy tamin’ny fotoana nanoratana ilay fitantarana ara-baiboly. Ilaina koa indraindray ny mahafantatra ny toe-javatra nanoratana ilay andinin-teny, mba hahazoana tsara azy io. Aoka hatao hoe hampiasa ny Hebreo 9:12, 24 ianao ao amin’ny lahateny iray momba ny avotra. Resahiny ao fa ny efitra anatiny indrindra amin’ny tabernakely dia sary mampiseho ny toerana nidiran’i Jesosy tany an-danitra. Mety hila ny hanazava vetivety momba azy io ianao alohan’ny hamakiana ilay andinin-teny. Aza mampiditra fanazavana fanampiny be loatra anefa, sao manjary tsy hita ny antony andraisanao ilay andinin-teny.

Diniho izay ataon’ireo mpandahateny za-draharaha, mba hanatsarana ny fomba hampidiranao ireo andininy. Mariho ireo fomba samy hafa ampiasainy. Jereo raha mandaitra ireo fomba ireo. Rehefa manomana ny anjaranao na lahateninao ianao, dia fantaro aloha ireo andinin-teny fototra. Eritrereto izay tokony ho zava-kendren’ny tsirairay aminy. Omano tsara ny fomba hampidirana ny tsirairay aminy, mba hisy vokany indrindra ny fampiasana azy. Avy eo, dia ampiharo amin’ireo andinin-teny rehetra hampiasainao izany fomba fanaovan-javatra izany. Rehefa mihatsara io lafiny iray amin’ny famelabelaranao io, dia hampifantoka bebe kokoa ny saina amin’ny Tenin’Andriamanitra ianao.