Fitenenana Tsy An-kijery Soratra

METY ho niezaka mafy ianao nanomana ny anjaranao na ny lahateninao. Mety hahafantaran-javatra sy hirindra tsara ilay izy. Mety hisosa tsara koa ny fiteninao. Raha tsy mifantoka anefa ny mpihaino anao, ka tsy mihaino afa-tsy tapatapany amin’izay lazainao fa mieritreritra zavatra hafa foana, handaitra ve ny famelabelaranao? Raha sarotra aminy ny mampifantoka ny sainy amin’ilay lahateny, hanohina ny fony ve ianao?

Inona no mahatonga io zava-manahirana io? Mety hisy antony maro samihafa. Antony fahita indrindra ny fitenenana mijery soratra rehefa manao anjara na lahateny. Mijery ny taratasiny matetika loatra ilay mpandahateny, na tsy tsotra ny fitenenany, fa manara-pitsipika loatra. Avy amin’ny fomba nanomanana ilay lahateny anefa izany rehetra izany.

Raha manoratra ny anjaranao na lahateninao manontolo aloha ianao, vao mamadika azy ho drafitra avy eo, dia ho sarotra ny hiteny tsy an-kijery soratra. Nahoana? Satria efa nifidy ireo teny hampiasainao ianao. Na dia ilay drafitra aza no ampiasainao rehefa manao ilay anjara na lahateny ianao, dia mitady hitadidy ireo teny nosoratanao tamin’ny voalohany ihany ianao. Manaraka fitsipika kokoa ny zavatra voasoratra, ary sarotra kokoa ny firafitry ny fehezanteniny, tsy toy ny resaka andavanandro. Hiseho eo amin’ny fitenenanao izany.

Aza soratana manontolo ny fanazavanao, fa andramo kosa izao manaraka izao: 1) Mifidiana loha hevitra iray sy ireo hevi-dehibe tianao hitondrana azy. Hevi-dehibe roa dia mety ho ampy ho an’ny anjara fohy iray, ary efatra na dimy kosa ho an’ny lahateny lava kokoa. 2) Soraty eo ambanin’ny hevi-dehibe tsirairay ireo andinin-teny lehibe tianao hamelabelarana azy; soraty koa ireo fanoharana sy porofo lehibe hampiasainao. 3) Eritrereto ny fomba hampidiranao ilay lahateny. Manorata fehezanteny iray na roa mihitsy aza. Omano koa ny famaranan-teninao.

Tena ilaina ny fanaovana famerenana. Aza ny teny tsirairay anefa no anaovana famerenana sy ianarana tsianjery. Ireo hevitra holazaina, fa tsy ireo teny, no tokony hanaovana famerenana, rehefa hanao anjara na lahateny tsy an-kijery soratra. Tokony haverimberinao ireo hevitra, mba hazava sy hirindra tsara ao an-tsainao ny fitohizan’izy ireo. Tsy tokony ho sarotra izany, raha nataonao nirindra tsara sy nilamina tsara ny firafitry ny fanazavanao. Ho tonga ho azy mora foana ireo hevitra, eo am-pitenenanao.

Ireo lafy tsarany. Ny lehibe indrindra amin’izany dia ny fahafahanao hiteny amin’ny fomba tsotra, ka mora heken’ny olona izay lazainao. Ho velombelona kokoa ny fiteninao, ka hahaliana ny mpihaino kokoa.

Ho afaka hijery ny mpihaino anao matetika ianao, ka hanatsara ny fifandraisanao aminy izany. Koa satria tsy mila mijery ny taratasinao ianao mba hilazana ny fehezanteny tsirairay, dia ho hitan’ny mpihaino fa hainao tsara ny foto-kevitrao ary tena mino izay lazainao ianao. Mety indrindra io fomba fitenenana io mba hanaovana famelabelarana amin-katsaram-panahy sy toy ny miresaka andavanandro, eny, lahateny tena manohina ny fo.

Ahafahana manovaova zavatra koa ny fitenenana tsy an-kijery soratra. Afaka manova zavatra sasany ianao, satria tsy hoe efa voasoratra avokoa izay tokony holazaina. Aoka hatao hoe misy filazam-baovao manaitra sy mifandray amin’ny foto-kevitrao, amin’iny andro anaovanao ny anjaranao na lahateninao iny. Tsy hety ve ny hiresahana momba azy io? Na hitanao eo am-panaovanao lahateny angamba, fa misy ankizy mpianatra be dia be eo anivon’ny mpanatrika. Tena tsara raha ahitsinao mifanaraka amin’izany ny fanoharana sy ny fampiharana ataonao, mba hanampiana an’ireo ankizy ireo hahita fa mahakasika ny fiainany ny fanazavanao!

Misy lafiny tsara hafa ny fitenenana tsy an-kijery soratra, satria mandrisika ny sainao koa izy io. Mihamafana fo ianao, rehefa mankasitraka sy manaiky izay lazainao ny mpihaino anao. Vonona hanome fanazavana kokoa ianao, na haka fotoana hamerenana sy hanamafisana hevitra sasany. Raha hitanao kosa fa manjary tsy liana ny mpihaino, dia afaka manitsy izany ianao, fa tsy hanohy hiteny foana amin’ny olona tsy mifantoka intsony.

Ireo fandrika tokony hohalavirina. Tokony ho fantatrao fa misy fandrika koa ny fitenenana tsy an-kijery soratra. Iray amin’izany ny fihoaram-potoana. Mety hihoatra ny fotoana, raha manampy hevitra be loatra ianao eo am-pitenenana. Afaka misoroka izany ianao, raha soratanao eo amin’ny drafitrao ny fotoana tokony haharetan’ny fizarana tsirairay. Araho tsara izany avy eo.

Fandrika iray hafa ny fatokisan-tena loatra, indrindra fa ho an’ny mpandahateny za-draharaha. Zatra miteny ampahibemaso ny sasany, ka tsy sarotra aminy ny manangona hevitra haingankaingana sy ny mameno ilay fotoana nomena azy. Tokony hanetry tena anefa isika ka hanaiky fa fandaharam-pampianarana avy amin’i Jehovah, ilay Mpampianatra Lehibe Indrindra, no andraisantsika anjara. Izany dia hahatonga antsika hihevitra ny anjara tsirairay ho zava-dehibe, ka hivavaka momba azy, ary hanomana azy tsara.—Isaia 30:20; Rom. 12:6-8.

Angamba mampanahy ny mpandahateny maro tsy zatra miteny tsy an-kijery soratra ny hoe sao hadinony izay tiany holazaina. Aza avela hisakana anao tsy hiezaka hianatra io fomba io izany. Manaova fanomanana tsara, ary miantehera amin’i Jehovah sy ny fanampian’ny fanahiny.—Jaona 14:26.

Mampiahotra ny mpitory hafa ny fahatahorana sao tsy mety ireo teny hilazany zavatra. Marina fa mety tsy hampiasa ny teny tsara indrindra na ny fitsipi-pitenenana marina indrindra, toy ny amin’ny lahateny vakina, ianao rehefa miteny tsy an-kijery soratra. Aleo lavitra anefa ny fitenenana manintona, toy ny amin’ny resaka andavanandro. Eken’ny olona kokoa ireo hevitra lazaina amin’ny teny mora azony, sy atao ao anaty fehezanteny tsy sarotra. Handeha ho azy ny filazana zavatra amin’ny fomba mety, raha manao fanomanana tsara ianao. Tsy noho ny fianaranao azy tsianjery anefa izany, fa noho ianao nanao famerenana tsara an’ireo hevitra. Ary raha tsara ny fomba fiteninao andavanandro, dia handeha ho azy izany eny amin’ny lampihazo.

Ny soratra fohy manao ahoana no tsara ampiasaina? Rehefa mandeha ny fotoana, ka mihazatra ianao, dia mety ho vitanao ny hamintina ny drafitrao tsy hisy afa-tsy teny vitsivitsy monja isaky ny hevitra ao amin’ny anjaranao na lahateninao. Soraty eo amin’ny taratasy iray, mba ho mora jerena, ireny teny ireny sy ireo andinin-teny tianao hampiasaina. Mila mitadidy drafitra tsotra kosa ianao, rehefa hanao fitoriana. Raha hanao fiverenana mitsidika ianao ka nanao fikarohana, dia ataovy ao anaty Baiboly ilay taratasy kely misy teny fohy vitsivitsy. Na ampiasao fotsiny ny drafitra iray ao amin’ny Foto-dresaka Ara-baiboly na ao amin’ny Fomba Fanjohian-kevitra avy Amin’ny Soratra Masina.

Raha nomena anjara maromaro amin’ny fivoriana samy hafa anefa ianao ao anatin’ny herinandro vitsivitsy, sady mbola hanao lahateny ho an’ny besinimaro koa, dia drafitra misy teny maromaro kokoa no mety hilainao. Nahoana? Mba hampitamberina ao an-tsainao ilay fanazavana, alohan’ny hanaovana ny anjara tsirairay. Na izany aza, raha miankina be loatra amin’ireo teny nosoratanao ianao, rehefa manao anjara na lahateny, ka mijery azy ireo isaky ny fehezanteny, dia tsy ho tsara toy ny fitenenana tsy an-kijery soratra, ny famelabelaranao. Tsipiho ireo teny sy andinin-teny vitsivitsy tianao hisongadina, mba ho mora hita, raha teny maromaro kokoa no ampiasainao ao anaty drafitra.

Na dia fitenenana tsy an-kijery soratra aza no tena tokony hataon’ny mpandahateny za-draharaha, dia tsara koa raha ampiarahiny amin’ny fomba hafa izany. Eo amin’ny teny fampidirana sy famaranana, ohatra, dia ilaina ny mijery tsara ny mpihaino sady manao fanambarana mahery amin’ny teny voafidy tsara. Fehezanteny vitsivitsy nianarana tsara no mety indrindra amin’izany. Tokony hovakina koa ny zavatra tena nisy, ny tarehimarika, ny tenin’olona, na ny andinin-teny, mba tena hanan-kery.

Rehefa mitaky fanazavana aminao ny hafa. Indraindray isika dia asaina manazava ny finoantsika, tsy misy fanomanana mialoha. Ohatra, mety tsy hanaiky izay lazaintsika ny olona iray eny amin’ny fanompoana, na ny havantsika, na ny mpiara-miasa na mpiara-mianatra amintsika. Mety hanontany momba ny zavatra inoantsika sy ny fomba fiainantsika koa ny manam-pahefana. Hoy ny Soratra Masina: “Aoka ho vonona mandrakariva hianareo hamaly izay manontany anareo ny amin’ny anton’ny fanantenana ao anatinareo, nefa amin’ny fahalemem-panahy sy ny fanajana.”—1 Pet. 3:15.

Mariho ny valin-tenin’i Petera sy i Jaona tamin’ny fitsarana jiosy, ao amin’ny Asan’ny Apostoly 4:19, 20. Fehezanteny roa monja, dia efa nazava ny toerana notanany. Nifanentana tamin’ny mpihaino azy ny fomba namaliany: nasehony fa nahakasika an’ireo mpitsara ireo koa ilay raharaha nahakasika an’ireo apostoly. Nisy fiampangana diso natao tamin’i Stefana tatỳ aoriana, ary nentina teo anoloan’ireo mpitsara ireo ihany izy. Vakio ao amin’ny Asan’ny Apostoly 7:2-53 ilay valin-teny nomeny teo no ho eo, tsy nisy fanomanana mialoha. Ahoana no nandaminany ny fanazavany? Nilaza zavatra arakaraka ny nisehoany teo amin’ny tantara izy. Tamin’ny fotoana nety tsara, dia nasongadiny fa tia fikomiana ny Isiraely. Nasehony tao amin’ny famaranan-teniny fa nanana izany toe-tsaina izany koa ireo mpitsara ireo, satria namono ny Zanak’Andriamanitra.

Rehefa asaina manazava ny finoanao eo no ho eo ianao, inona no hataonao mba hilazana zavatra mandaitra? Araho ny ohatr’i Nehemia: Nivavaka anakampo aloha izy, vao namaly ny fanontanian’i Artaksersesy Mpanjaka. (Neh. 2:4) Avy eo, dia manaova drafitra ao an-tsaina haingana. Ireto avy ny dingana azonao arahina amin’izany: 1) Mifidiana hevitra iray na roa tokony hiditra ao amin’ny fanazavanao (Azonao ampiasaina ny hevitra efa hitanao tao amin’ny Fomba Fanjohian-kevitra avy Amin’ny Soratra Masina.) 2) Fidio izay andinin-teny hanohananao ireo hevitra ireo. 3) Eritrereto mialoha izay fomba voalanjalanja azonao ampidiran-dresaka, mba hahatonga ilay mpanontany ho vonon-kihaino. Mitenena amin’izay.

Rehefa teren’ny toe-javatra ianao, moa ve ho tadidinao izay tokony hatao? Hoy i Jesosy tamin’ny mpanara-dia azy: “Aza manahy ny amin’izay fomba hitenenanareo, na izay holazainareo; fa homena anareo amin’izany ora izany izay holazainareo. Fa tsy hianareo no miteny, fa ny Fanahin’ny Rainareo no miteny ao anatinareo.” (Matio 10:19, 20) Tsy midika akory izany fa hisy fahagagana, ka hahazo ilay “teny fahendrena” nomena ny Kristianina tamin’ny taonjato voalohany koa ianao. (1 Kor. 12:8) Tsia, fa raha mandray tsy tapaka ilay fampianarana omen’i Jehovah ny mpanompony ianao, dia hamerina ao an-tsainao ilay fanazavana ilainao ny fanahy masina.—Isaia 50:4.

Tsy isalasalana fa tena mandaitra ny fitenenana tsy an-kijery soratra. Raha mizatra manao izany tsy tapaka ianao, rehefa manao anjara any amin’ny Efitrano Fanjakana, dia tsy ho sarotra ny hamaly fanontanian’olona eo no ho eo, satria mitovy ihany ny fomba arahina amin’ireo toe-javatra roa ireo. Aza miahotra hanao izany. Hahatonga ny fanompoanao handaitra kokoa ny fianarana miteny tsy an-kijery soratra. Ary rehefa manao anjara na lahateny ao amin’ny Efitrano Fanjakana ianao, dia hihazona ny fahalianan’ny mpanatrika sady hanohina ny fony.