Famaranan-teny Mandaitra

METY ho nanao fikarohana tamim-pitandremana sy nandamina tsara ireo fanazavanao ianao. Mety ho nanomana fampidiran-dresaka mahaliana koa ianao. Mbola misy zavatra iray hafa ilaina anefa: famaranan-teny mandaitra. Aza hamaivanina izy io. Matetika izay lazainao farany no tena tadidin’ny olona. Raha tsy mety ny famaranan-teny, dia angamba ho very maina ny ankabeazan’izay nolazaina teo aloha.

Diniho izao manaraka izao: Nanao lahateny tsy hay hadinoina tamin’ireo anti-panahin’ny firenen’ny Isiraely i Josoa, rehefa nadiva ho faty. Rehefa avy nitantara indray ny fifandraisan’i Jehovah tamin’ny Isiraely hatramin’ny andron’i Abrahama i Josoa, moa ve izy namintina fotsiny ireo zava-nisongadina? Tsia. Nananatra an’ilay vahoaka tamim-pihetseham-po lalina kosa izy hoe: “Matahora an’i Jehovah, ka manompoa Azy amin’ny fahitsiana sy ny fahamarinana.” Vakio ao amin’ny Josoa 24:14, 15 izany famaranan-tenin’i Josoa izany.

Lahateny hafa niavaka koa ny nataon’ny apostoly Petera tamin’ny vahoaka tafangona tao Jerosalema, tamin’ny Pentekosta 33 am.f.i. Hita ao amin’ny Asan’ny Apostoly 2:14-36 izy io. Nohazavainy aloha fa fahatanterahan’ny faminanian’i Joela momba ny hirotsahan’ny fanahin’Andriamanitra no hitan’izy ireo teo. Nasehony avy eo, ny nifandraisan’izany tamin’ireo faminanian’ny Salamo momba ny Mesia, dia ny hitsanganan’i Jesosy Kristy amin’ny maty sy ny hanandratana azy eo an-tanana ankavanan’Andriamanitra. Nambaran’i Petera mazava tsara tao amin’ny famaranan-teniny avy eo ilay raharaha tsy maintsy natrehin’ny rehetra. Hoy izy: “Koa aoka ho fantatry ny taranak’Isiraely rehetra marimarina fa iny Jesosy nohomboanareo tamin’ny hazo fijaliana iny dia efa nataon’Andriamanitra ho Tompo sy Kristy.” Hoy ireo nanatrika teo: “Ry rahalahy, inona no hataonay?” Namaly i Petera hoe: “Mibebaha, ary aoka samy hatao batisa amin’ny anaran’i Jesosy Kristy hianareo rehetra.” (Asa. 2:37, 38) Tena nanohina ny fon’ny olona tokony ho 3 000 izay reny tamin’io andro io, ka nanaiky ny fahamarinana momba an’i Jesosy Kristy izy ireo.

Hevitra tokony hotadidina. Tokony hifandray mivantana amin’ny loha hevitry ny lahateninao ny famaranan-teninao. Tokony hamarana amin’ny fomba mirindra ireo hevi-dehibe novelabelarinao izy io. Mety hisy teny tao amin’ny foto-kevitra, tianao hampidirina ao amin’ny famaranan-teny. Azonao lazaina amin’ny teny hafa izy ireny.

Ny hampirisika ny hafa hampihatra ilay zavatra hazavainao mazàna no kendrenao. Anisan’ny zava-kendrena lehibe indrindra amin’ny famaranan-teny ny hampiseho amin’ny mpihaino izay tokony hataony. Fony ianao nifidy ny foto-kevitra sy ireo hevi-dehibe, moa ve efa nodinihinao tsara ny antony tena ilan’ny mpihaino ilay fanazavana sy ny zava-kendrenao amin’izy io? Raha eny, dia fantatrao ilay zavatra tianao hataon’izy ireo. Ilainao hohazavaina hoe inona izany zavatra izany sy hoe ahoana no hanatanterahana azy.

Tsy vitan’ny hoe mampiseho amin’ny mpihaino izay tokony hataony fotsiny ny famaranan-teny, fa tokony hanosika azy hampihatra koa. Tokony hasiana antony marim-pototra hanaovan-javatra ao, ary angamba koa ny soa aterak’izany. Hanamafy ny herin’ilay lahateny manontolo ny fehezanteny farany raha voahevitra tsara sy voarafitra tsara.

Tadidio fa hifarana ny lahateninao. Tokony ho hita ao amin’ny teninao izany. Tokony hasehon’ny hafainganam-piteninao koa izany. Aza miteny haingana be hatramin’ny farany, dia mijanona tampoka avy eo. Aza ampidinina fotsiny koa anefa ny feonao. Tokony ho mafy tsara ny feonao, fa tsy mafy loatra. Tokony ho re amin’ireo fehezanteninao farany fa hamarana ny teninao ianao. Tokony ho feno fahatsoram-po sy fatokiana ny filazanao azy ireo. Rehefa manao famerenana ny anjara na lahateninao ianao, dia aza hadinoina ny mamerimberina amin’ny feo avo ny famaranan-teninao.

Tokony hanao ahoana ny halavan’ny famaranan-teny? Tsy azo faritana ara-bakiteny izany. Tsy tokony hitohy, toa tsy hisy farany, anefa ny famaranan-teny. Ny vokany eo amin’ny mpihaino no azo amaritana raha mety ny halavany na tsia. Ankasitrahana foana ny famaranan-teny tsotra sy mivantana ary mampahery. Handaitra koa ny famaranan-teny somary lava kokoa, izay misy fanoharana fohy, raha efa voalamina tsara mialoha. Ampitahao ny teny fohy mamarana ny boky manontolon’ny Mpitoriteny (ao amin’ny Mpitoriteny 12:13, 14), sy ny teny mamarana ny Toriteny teo An-tendrombohitra izay fohy kokoa (ao amin’ny Matio 7:24-27).

Eny amin’ny fanompoana. Eny amin’ny fanompoana no tena ahitanao fa ilaina ny famaranan-teny. Ny fanomanana sy ny fiheverana ny olona amim-pitiavana, no ahavitan-javatra tsara be dia be. Azo ampiharina tsara amin’ny resaka ifanaovana amin’ny olona iray koa ny torohevitra nomena teo aloha.

Mety ho fohy kely ny resaka. Mety ho sahirana ilay olona. Mety tsy haharitra afa-tsy iray minitra ilay fitsidihana. Raha mety, dia milazà zavatra toy izao: “Hitako fa sahirana ianao, tompoko. Misy hevitra iray mampahery anefa ity, tiako holazaina aminao vetivety, alohan’ny handehananay. Asehon’ny Baiboly fa mikasa hanao zavatra mahatalanjona ny Mpamorona: hanao ny tany ho toerana hiainan’ny olona mandrakizay. Afaka ny hiaina ao amin’izany Paradisa izany isika, tompoko, nefa mila mianatra izay takin’Andriamanitra amintsika.” Na lazao fotsiny fa hiverina amin’ny fotoana mety kokoa ianao.

Mbola misy azo atao ihany raha tapaka tampoka ilay fitsidihana, noho ilay tompon-trano mitratrevatreva, na tsy mahalala fomba mihitsy aza. Tadidio ilay torohevitra ao amin’ny Matio 10:12, 13 sy Romana 12:17, 18. Mety hanova ny fomba fiheviny momba ny Vavolombelon’i Jehovah ny famalianao amim-pahamoram-panahy. Efa mahavita zavatra tsara izany.

Mety hahafa-po koa anefa ny resaka amin’ny tompon-trano. Nahoana raha averina lazaina ilay hevi-dehibe tianao hotadidiny? Lazao koa ny antony tokony hanosika azy hampihatra ilay izy.

Raha hitanao fa azo tohizina amin’ny fotoana hafa ilay resaka, dia omeo antony hiandrasana izany amin-kafaliana ilay olona. Mametraha fanontaniana iray, angamba fanontaniana resahina ao amin’ny Fomba Fanjohian-kevitra avy Amin’ny Soratra Masina na ao amin’ny boky iray fampianarana Baiboly. Tadidio ny tanjonao, dia ilay nambaran’i Jesosy ao amin’ny Matio 28:19, 20.

Eo am-pamaranan-dresaka any amin’ny fampianarana Baiboly iray ve ianao? Avereno lazaina ilay foto-kevitra, mba hanampiana ilay mpianatra hitadidy izay noresahinareo. Ampiasao ireo fanontaniana famerenana, mba hitadidiany ireo hevitra fototra, ka ataovy miadana fa tsy maimaika izany. Hanampy ilay mpianatra hahay hampiasa izay nianarany ny fanontaniana azy hoe: Inona no soa azony avy tamin’ilay fianarana? Na hoe: Ahoana no azony anazavana izany amin’ny hafa?—Ohab. 4:7.

Tadidio fa mahatonga ilay resaka manontolo handaitra na tsia, ny famaranan-teninao.