Toko 21

Inona no Hataoko fa Bedy Foana Aho?

“Tsy maintsy mahita zavatra hibedesana ahy foana mamanay. Mbola tsy vitako akory ny raharaha nasainy nataoko, dia efa iny izy fa mijery an’izay tsy mety, amin’izay mba misy hitenenana ahy.”—Tantely.

“Bedin’ny dada sy mamanay foana aho. Tsy haiko, hono, ny mandamina ny fiainako. Tsy nisy tsy nibedesany ahy, na izay nataoko tany am-pianarana, na tao an-trano, na tany am-pivoriana.”—Njaka.

TOA tsy mahafaly ny ray aman-dreninao mihitsy ve izay ataonao? Toa arahiny maso lava izao ve ianao, nefa toa tsy mba milaza mihitsy izy hoe nahavita zavatra tsara ianao?

Iza amin’ireto no tena lazainy matetika?

□ Mikorontana be foana ny entanao.

□ Ny anao dia io mijery tele io foana!

□ Alina loatra ianao vao matory.

□ Tara be foana ianao vao mifoha.

Soraty eto izay fananarana na zavatra averimberin’ny ray aman-dreninao foana, ka tsy tianao maizina.

․․․․․

Mahatezitra anao angamba ilay hoe baikobaikoina sy tenitenenina. Ahoana anefa raha tsy niteny na nananatra anao mihitsy ny ray aman-dreninao? Tsy hieritreritra ve ianao hoe sao dia mba tsy tia anao ry zareo? (Hebreo 12:8) Tia anao izy ireo matoa mananatra anao. Milaza ny Baiboly fa izay “zanaka tiany” ihany no anarin’ny rainy.—Ohabolana 3:12.

Tokony ho faly àry ianao, satria tena tia anao ny ray aman-dreninao matoa mananatra anao! Sady mbola tanora koa ianao, ka mbola tsy nahita fiainana. Tsy maintsy hila fananarana ihany ianao, na ho ela na ho haingana. Mety ho mora resin’ny “faniriana mpitranga eo amin’ny tanora” koa ianao, raha tsy misy mananatra.—2 Timoty 2:22.

Ka mankarary fo ange ilay izy e!

Marina fa “tsy misy famaizana toa mahafaly eo no ho eo, fa mampahory.” (Hebreo 12:11) Ary ny tanora indrindra no tsy mahatanty famaizana. Tsy mahagaga izany! Mbola miovaova ny fihetseham-ponao, sady mbola tsy tena olon-dehibe matotra ianao. Mety ho tezitra àry ianao, na dia tenenin’ny ray aman-dreninao moramora aza, ary na efa mba noeritreretiny tsara aza izay holazaina aminao.

Tsy mahagaga raha tezitra ianao. Arakaraka izay lazain’ny olona momba anao mantsy no mahatonga anao hieritreritra hoe ankizy hendry ianao sa tsia. Ary izay lazain’ny ray aman-dreninao no tena raisinao am-po. Izany no mahatonga anao halahelo be, rehefa mibedy anao izy, na mimenomenona momba izay nataonao.

Tokony hieritreritra àry ve ianao hoe tsy misy mety mihitsy izay ataonao, rehefa bedy ianao? Na hoe tsy mahay na inona na inona ianao? Tsia. Mety ho zavatra kely fotsiny mantsy no nibedesany anao. Tadidio fa manao fahadisoana daholo isika. (Mpitoriteny 7:20) Ary raha tsy manao fahadisoana isika, dia tsy ho hitantsika mihitsy izay zavatra mila ahitsy. (Joba 6:24) Ahoana anefa raha tsy mahay afa-tsy ny mibedy anao ny ray aman-dreninao, fa tsy mba midera anao mihitsy rehefa mahavita zavatra tsara ianao? Mankarary fo izany, nefa tsy midika hoe tsy mahay na inona na inona ianao.

Nahoana ianao no bedy?

Tsy noho ianao nanao fahadisoana loatra indraindray no mahatonga ny ray aman-dreninao hiteniteny be anao, fa noho izy sorena fotsiny. Sao dia mba niasa mafy, ohatra, ny mamanao nandritra ny andro, na nanana olana hafa? Sa kosa marary izy? Aza gaga àry raha masiaka aminao tsy toy ny isan’andro izy, raha tsy milamina tsara ny entanao. Sorena ve ny dadanao satria tsy manam-bola? Mety hasiaka aminao koa izy, ary mety ho “toy ny fanindron’ny sabatra” ny teniny. (Ohabolana 12:18) Marina aloha fa tsy rariny ny ataony, ka mahasorena. Aza mifantoka amin’izany anefa. Vao mainka mantsy ianao halahelo. Miezaha kosa hamela ny fahadisoany. Tadidio fa ‘manao fahadisoana imbetsaka isika rehetra. Raha misy tsy manao fahadisoana amin’izay lazainy, dia izy no olona lavorary.’—Jakoba 3:2.

Mety hisy antony hafa koa mahatonga anao ho bedy. Tsy lavorary ny ray aman-dreninao, ka mety hieritreritra hoe tsy misy mety mihitsy izay ataony. Raha nisy zavatra tsy hainao àry, dia mety hihevitra izy ireo fa izy mihitsy no tsy mahay mitaiza. Aoka hatao hoe bediny ianao, satria ratsy ny naotinao. Mety ho izao no ao an-tsainy: ‘Sao dia mba tsy mahay mitaiza àry izahay, satria tsy manao izay vitanay mba hanampiana ny zanakay?’

Aza mora tezitra

Inona no azonao atao rehefa bedy ianao? Voalohany, aza be famaliana. Hoy ny Ohabolana 17:27: “Manana ny tena fahalalana ny olona mahafehy ny vavany, ary tony ny olona mahay manavaka.” Inona no hanampy anao ho “tony” rehefa bedy? Andramo ireto soso-kevitra ireto:

Mihainoa. Aza maika hiaro tena na hilaza hoe tsy diso ianao. Miezaha kosa tsy ho tezitra, ary henoy tsara ny ray aman-dreninao. Nampirisihin’i Jakoba mpianatra ny Kristianina, mba ho “mailaka hihaino, tsy ho maika hiteny, tsy ho mora tezitra.” (Jakoba 1:19) Raha tezitra ianao ka manapaka ny tenin’ny ray aman-dreninao, dia hihevitra izy fa tsy mihaino azy ianao. Ho sosotra izy, ka vao mainka ianao hobedesiny.

Mifantoha amin’izay lazainy. Masiaka be angamba ny ray aman-dreninao indraindray rehefa mibedy anao. Aza eritreretina anefa ny fomba itenenany anao. Mifantoha kosa amin’izay lazainy. Mieritrereta hoe: ‘Inona amin’izany teniny izany no marina? Efa nimenomenona momba an’io zavatra io ve ry zareo taloha? Dia ho voa mafy ve aho raha manao izay asainy hataoko?’ Tadidio fa tia anao ry zareo matoa miteny anao, na dia toa masiaka aza. Tsy ho nananatra anao mihitsy izy, raha tsy tia anao.—Ohabolana 13:24.

Asehoy fa nihaino tsara ianao. Avereno aminy amim-panajana ny teniny. Ho hitany amin’izay fa nihaino tsara ianao. Mety hiteny, ohatra, izy hoe: “Mikorontana be foana ny entanao. Alamino haingana ireo, fa raha tsy izany dia hahita raharaha amiko ianao!” Efa milamina angamba ny fahitanao ny entanao. Vao mainka anefa izy ho tezitra, raha izany no lazainao. Miezaha kosa hanaiky ny teniny. Aleo milaza hoe: “Eny àry e! Tonga dia alamiko ve, sa rehefa avy misakafo?” Aza manesoeso rehefa miteny an’izany. Mety tsy ho tezitra be intsony izy, raha asehonao fa nihaino tsara ianao. Tandremo anefa sao tsy arahinao akory ny teniny.—Efesianina 6:1.

Miandrasa. Aza manazava na inona na inona, raha tsy efa vitanao izay nasainy natao. Hoy ny Baiboly: ‘Malina ny olona mahafehy ny vavany.’ (Ohabolana 10:19) Ho vonona kokoa hihaino anao ny ray aman-dreninao, rehefa hitany fa tena nihaino azy ianao.

Iza amin’ireo no tena mbola sarotra aminao ny manaraka azy? ․․․․․

Nahoana no mahasoa ny miaritra?

Vonona hiaritra ny mafy ny olona mitady volamena. Milaza anefa ny Baiboly fa sarobidy lavitra noho ny volamena ny fahendrena. (Ohabolana 3:13, 14) Inona no hanampy anao ho hendry? Hoy ny Ohabolana 19:20: “Henoy ny torohevitra, ary raiso ny anatra mba ho hendry ianao amin’ny hoavy.” Marina fa tezitra isika indraindray, rehefa toroana hevitra na anarina. Mba misy teny feno fahendrena ihany anefa ao amin’ireny anatra ireny. Raha tadiavinao izany ary ankatoavinao, dia handray soa ianao, satria hahazo zava-tsarobidy noho ny volamena. Tsy inona izany fa ny fahendrena.

Tsy misy mihitsy izany olona tsy bedy izany. Efa hatramin’ny mbola kely, ohatra, ianao, no efa bedin’ny ray aman-dreny sy ny mpampianatra. Tsy maintsy ho bedin’ny mpampiasa na olon-kafa koa ianao, any aoriana any. Ka tsy aleonao ve ianarana dieny izao izay tokony hatao, rehefa bedy? Ho lasa mpianatra mahay ianao amin’izay, ary ho tian’ny mpampiasa anao, rehefa lehibe. Ho tsapanao koa hoe ilaina ianao. Miareta kely fotsiny àry rehefa bedy, dia hahazo ireo valisoa ireo ianao!

ANDININ-TENY

“Hihaino ny hendry ka hitombo ny zavatra fantany.”—Ohabolana 1:5.

SOSO-KEVITRA

Inona no azonao atao, mba ho mora aminao ny hanaiky ny fananaran’ny ray aman-dreninao?

● Misaora azy raha derainy ianao vao anariny.

● Mangataha fanazavana raha tsy azonao ny antony itenenany anao, na tsy mazava tsara aminao izay asainy hataonao.

FANTATRAO VE... ?

Tsy mahay maneho fitiavana amin’ny zanany ny ray aman-dreny sasany, satria tsy nanehoana fitiavana koa izy, tamin’ny mbola kely.

ZAVATRA ERITRERETIKO HATAO!

Izao no hataoko, raha bedin’ny ray aman-dreniko aho amin’ny manaraka: ․․․․․

Izao no hataoko raha hitako fa teniteneniny be loatra aho: ․․․․․

Izao no hanontaniako ny ray aman-dreniko momba izany: ․․․․․

AHOANA NY HEVITRAO?

● Nahoana ianao no tsy mahatanty tenenina indraindray?

● Nahoana ianao no bedy indraindray?

● Inona no azonao atao, mba handraisanao soa avy amin’ny torohevitra omena anao?

[Teny notsongaina, pejy 177]

Nivazavaza tamiko foana mamanay taloha, dia novalivaliako koa. Miezaka mankatò ny Tenin’Andriamanitra anefa aho izao. Mahasoa ilay izy, satria tsy hoatran’ny taloha intsony mamanay. Lasa azoko koa hoe naninona izy no nibedy ahy. Mifankatia kokoa izahay mianaka izao.’’—Cynthia

[Sary, pejy 180]

Mba misy teny feno fahendrena ihany ao amin’ny anatra. Sarobidy noho ny volamena izany, ka hahasoa anao, raha tadiavinao sy ankatoavinao