Ny Loza Fahafolo

Niteny tamin’i Farao i Mosesy hoe tsy hankany aminy intsony. Talohan’ny nandehanany anefa, dia hoy izy: ‘Ho faty daholo ny lahimatoa rehetra eto Ejipta amin’ny 12 alina, hatramin’ny zanak’i Farao ka hatramin’ny zanaky ny mpanompo.’

Nasain’i Jehovah nanomana sakafo manokana aloha ny Israelita. Hoy izy: ‘Makà ondrilahy na osilahy anankiray herintaona, dia vonoy. Akao ny rany, dia hosory eo amin’ny varavarana. Atonoy ny henany, ary hano miaraka amin’ny mofo tsy misy leviora. Anaovy koa ny akanjonareo sy ny kapanareo, dia miomankomàna fa alefako mandeha ianareo androany alina.’ Faly be izao ny Israelita e?

Nitety ny trano rehetra tany Ejipta ny anjelin’i Jehovah tamin’ny 12 alina. Nojereny izay varavarana tsy nisy ra, dia novonoiny ny lahimatoa tao amin’ilay trano. Nandalovan’ilay anjely fotsiny kosa izay trano nisy ra ny varavarany. Samy nanana zaza iray maty daholo ny fianakaviana ejipsianina rehetra, na nanankarena ry zareo na nahantra. Tsy nisy maty kosa ny zanaky ny Israelita, na iray aza.

Na ny zanak’i Farao aza maty. Tena tsy zakan’i Farao izany, ka tonga dia noteneniny i Mosesy sy Arona hoe: ‘Mandehana mandeha any daholo ianareo! ’Ndana mivavaka amin’izany Andriamanitrareo izany, dia ento koa ny biby fiompinareo!’

Diavolana be ny andro rehefa niala tany Ejipta ny Israelita. Nisy 600 000 ny lehilahy, ary be dia be koa ny vehivavy sy ny ankizy. Samy niaraka tamin’ny fianakaviany sy ny fokony ry zareo, dia nilamina tsara. Betsaka koa ny olona tsy Israelita nanaraka an-dry zareo satria te hivavaka amin’i Jehovah. Ela ny ela ka tsy andevo intsony ny Israelita!

Tokony hanao sakafo manokana hoatran’iny ry zareo isan-taona, amin’izay tadidiny foana hoe namonjy azy i Jehovah. Nantsoina hoe Paska ilay izy.