Niteny Ilay Ampondra

Efa ho 40 taona izao ny Israelita no tany an-tany efitra. Be dia be ny tanàna matanjaka efa resin-dry zareo. Tonga teo amin’ny lemak’i Moaba, teo atsinanan’ny Reniranon’i Jordana, ry zareo, ary efa hiditra ao amin’ny Tany Nampanantenaina. Natahotra be i Balaka mpanjakan’i Moaba hoe ho lasan’ny Israelita daholo ny taniny. Nasainy nankany Moaba àry ny lehilahy anankiray antsoina hoe Balama, mba hanozona ny Israelita.

Hoy anefa i Jehovah tamin’i Balama: ‘Tsy mahazo manozona ny Israelita ianao.’ Tsy nety nankany Moaba àry i Balama. Nasain’i Balaka ho any aminy indray izy, sady noteneniny hoe homeny an’izay rehetra tiany. Mbola tsy nety nandeha ihany anefa i Balama. Farany, dia hoy Andriamanitra taminy: ‘Mahazo mandeha àry ianao, fa izay asaiko teneninao ihany no hoteneninao.’

Notaingenan’i Balama ny ampondrany, dia lasa izy nianatsimo nankany Moaba. Mbola saika hanozona ny Israelita ihany izy, nefa efa tsy navelan’i Jehovah hanao an’izany. Nisy anjelin’i Jehovah àry nisakana ny lalany intelo. Tsy hitan’i Balama ilay anjely, fa hitan’ny ampondrany. Nivily nankeny amin’ny saha ilay ampondra tamin’ny voalohany. Avy eo ilay izy nitampify tamin’ny tamboho vato ka tery tao ny tongotr’i Balama. Farany dia nitokona tsy nety nandeha ilay ampondra. Nataon’i Balama maty kapoka ilay ampondra tamin’ireo fotoana ireo!

Nataon’i Jehovah niteny ilay ampondra taorian’izay. Hoy ilay izy tamin’i Balama: ‘Fa maninona aho no kapohinao foana?’ Hoy i Balama: ‘K’ianao tsinona manadala an’ahy! Raha nanana sabatra aho dia efa novonoiko ianao.’ Hoy ilay ampondra: ‘’Ngah tsy efa izaho foana ny ampondra fitaingenanao hatramin’izay? Dia efa nanao hoatr’izao taminao ve ’zaho?’

Nataon’i Jehovah nahita an’ilay anjely amin’izay i Balama. Hoy ilay anjely: ‘Efa notenenin’i Jehovah ianao hoe tsy mahazo manozona ny Israelita.’ Dia hoy i Balama: ‘Tena diso aho. Aleo àry aho hiverina hody e!’ Hoy anefa ilay anjely: ‘Mahazo mankany Moaba ianao, fa izay asain’i Jehovah teneninao ihany no azonao tenenina.’

Mba nandray lesona tamin’iny ve i Balama? Tsia! Mbola nitady hanozona ny Israelita intelo ihany izy. Navadik’i Jehovah ho tsodrano foana anefa ilay ozona. Notafihin’ny Israelita i Moaba tatỳ aoriana, ary maty koa i Balama. Hoatr’izay izy tsy maty raha nankatò an’i Jehovah hatramin’ny voalohany!