BALAKA
(Balàka) [Nandrava Izy].
Mpanjakan’i Moaba mpivavaka tamin’i Bala, tamin’ny taonjato faha-15 T.K.; zanakalahin’i Zipora. Nihorohoro sy “raiki-tahotra mafy” ny vahoakan’i Balaka, rehefa nahita izay nataon’ny Israely tamin’ny Amorita. Niray dina tamin’ny Midianina àry izy, ary nampaka an’i Balama tany amin’ny tanànan’i Petora akaikin’ny Reniranon’i Eofrata, tany Mezopotamia. Nanantena izy fa ho resiny ny Israely, raha manozona sy mampiasa “herin’ny maizina” hamelezana azy ireo i Balama. (No 23:21) Hoy i Balaka taminy: “Nivoaka avy tany Ejipta [ny Israelita], ka mandrakotra ny tany hatrany amin’izay faran’ny taza-maso, ary mitoetra tandrifiko mihitsy izy ireo.” Tsy nety nandeha i Balama tamin’ny voalohany. Nanaiky ihany anefa io mpaminany matimatin-karena io, rehefa nandefa andriana nanan-kaja kokoa sy nampanantena valisoa lehibe kokoa i Balaka. Namela azy handeha koa i Jehovah. Somary nibedy azy i Balaka, rehefa nihaona teo amoron’i Arnona izy ireo. Hoy izy: “Nahoana ianao no tsy tonga tatỳ amiko [avy hatrany]? Heverinao angaha fa tsy ho vitako mihitsy ny hanome voninahitra anao?”—No 22:2-37.
Nentin’i Balaka teny amin’ny havoana telo samy hafa i Balama, mba hahatazanany ny Israelita maro be. Nitovy foana ny zavatra nampanaoviny an’i Balaka rehefa tonga teny: Nasainy nanorina alitara fito sy nanao sorona ombilahy fito sy ondrilahy fito izy. Tsy nahavita nanozona ny Israely mihitsy anefa i Balama, fa vao mainka aza nitso-drano azy.—No 22:41–24:9; Mi 6:5.
Dia “nirehitra tamin’i Balama ny fahatezeran’i Balaka.” Nitehaka izy sady niteny hoe: “Ny hanozona ny fahavaloko no niantsoako anao, nefa vao mainka nitso-drano azy intelo ianao. Koa mandosira any amin’izay misy anao.” Talohan’ny nandehanany anefa, dia nilaza io mpaminany avy any Petora io, fa hisy Mesia na “kintana” hivoaka avy amin’ny taranak’i Jakoba.—No 24:10-17; Js 24:9, 10; Mpts 11:25.
Hita koa tatỳ aoriana fa ‘nampianarin’i Balama hitaona ny zanak’Israely hanota, ka hihinana zavatra natao sorona ho an’ny sampy sy hijangajanga’, i Balaka.—Ap 2:14; No 25:1-18.