Nanota i Davida Mpanjaka

Lasa mpanjaka i Davida rehefa maty i Saoly, ary 30 taona izy tamin’izay. Rehefa nanjaka elaela izy, dia nanao zavatra tena ratsy. Teny an-tampon-tranony izy indray alina izay, dia nahatazana vehivavy tsara tarehy. Fantany avy eo hoe Batseba no anaran’ilay vehivavy, dia miaramila antsoina hoe Oria ny vadiny. Nampanantsoiny ho any an-dapany i Batseba, dia nanao firaisana ry zareo. Bevohoka i Batseba avy eo. Niezaka nanafina ny zavatra nataony anefa i Davida. Hoy izy tamin’ny jeneraliny: ‘Rehefa miady ianareo, dia ataovy eny aloha indrindra i Oria dia avy eo ianareo mitsoaka.’ Dia maty i Oria, ka nanambady an’i Batseba i Davida.

Hitan’i Jehovah daholo anefa izany. Inona àry no nataony? Nirahiny hiresaka tamin’i Davida i Natana mpaminany. Dia hoy Natana tamin’i Davida: ‘Nisy lehilahy mpanankarena sy mahantra, samy nanana ondry. Ny an’ilay mpanankarena be dia be, fa ny an’ilay mahantra ondrivavy kely iray izay fotsiny sady tena tiany be. Nalain’ilay mpanankarena anefa ilay izy.’ Tezitra be i Davida ka niteny hoe: ‘Tokony hovonoina ho faty izany lehilahy izany!’ Dia hoy i Natana: ‘Ianao ange izany e!’ Nalahelo be i Davida ka niaiky hoe: ‘Tena nanota tamin’i Jehovah aho.’ Lasa nikorontana be ny fiainan’i Davida sy ny fianakaviany, noho ilay fahotany. Nosazin’i Jehovah izy, nefa tsy novonoiny ho faty satria nitsotra ny marina dia nanetry tena.

Te hanamboatra tempoly ho an’i Jehovah i Davida. I Solomona zanany anefa no tian’i Jehovah hanao an’ilay izy. Nanomana ny zavatra rehetra nilaina àry i Davida. Hoy izy: ‘Tsy maintsy hatao tsara be mihitsy ny tempolin’i Jehovah. I Solomona anefa mbola kely, dia hampiako hanomana ny zava-drehetra izy.’ Nanome vola be i Davida hanaovana an’ilay fanorenana, ary nitady mpiasa mahay. Nanangona volamena sy volafotsy koa izy, ary nanafatra hazo sedera avy tany Tyro sy Sidona. Rehefa akaiky ho faty izy, dia nomeny an’i Solomona ny planin’ilay tempoly. Hoy izy: ‘Nasain’i Jehovah nanao an’ireto planina ireto ho anao aho. Aza matahotra fa hanampy anao izy. Mahereza dia ataovy ilay asa.’