Velona ny Tenin’Andriamanitra

Nahoana no manao ratsy ny olona?

IO lehilahy izay miady eo am-pototry ny manda, ao amin’ny voalohan-daharana io,dia Oria. Davida, mpanjakan’ny Isiraely, dia nandefa ho an’i Joaba mpitari-tafiny, hafatra iray voasoratra toy izao: “Arosoinareo amin’ny ady mafy Oria; dia ilaozy izy mba hasiany ho faty.” — 2 Samoela 11:15.

Oria anefa dia lehilahy nahatoky sady tsara. Koa nahoana àry Davida izay nanompo an’i Jehovah tahaka azy, no ninia nampamono azy?

Ny famakiana izao andalan-teny manaraka izao, nalaina avy ao amin’ny Baiboly, dia tsy isalasalana fa hanazava amintsika ny amin’ny antony nanosika azy: “Andriamanitra tsy azon’ny ratsy alaim-panahy sady tsy mba maka fanahy olona Izy; fa samy alaim-panahy ny olona raha tarihin’ny filany sy fitahiny izy. Ary ny filana, rehefa torontoronina dia miteraka ota; ary ny ota, rehefa tanteraka, dia miteraka fahafatesana.” — Jakoba 1:13-15.

Nefa angamba ianao hanontany tena hoe amin’ny ahoana izany fanambarana izany no manampy antsika hahafantatra ny antony nampamonoan’i Davida an’i Oria? Mba hahafantarana an’izany, dia aoka hojerentsika indray ny fisehoan-javatra izay nitarika an’i Davida haniry ny fahafatesany.

Indray andro, tamin’ny tsy naha-teo an’i Oria, Davida dia teo an-tampon’ny tranony. Avy teo no nahitany ny vadin’i Oria, i Batseba tsara tarehy, izay nandro. Inona no nataony? Nanohy nitazana azy izy. Tamin’ny fanaovana toy izany, dia navelany hitombo tao am-pony ny faniriana hanana firaisana ara-nofo aminy. Aoka anefa isika tsy hihevitra fa Andriamanitra no naka fanahy na nisedra azy. Tsia, Davida kosa dia voatarika sy voafitaky ny fanirian’ny tenany.

Tamin’ny farany, io fanirian-dratsy io dia nihanahery tao aminy ka nahatonga azy hampaka an’i Batsaba tao an-dapany. Tao dia nanana firaisana taminy izy. Taty aoriana, dia nanana anaka i Batseba ary Davida izay tsy afaka nanafina ny fijanjangajangan’izy ireo dia nanao izay hampamonoana an’ i Oria tany an’ady.

Marina fa ny fahotan’i Davida dia tsy nahatonga azy hamoy mandrakizay ny fankasitrahan’Andriamanitra na nitarika ho azy, fanamelohana ho faty. Davida tokoa dia nampiseho fibebahana tamim-pahatsorana, ary Jehovah dia namindra fo taminy (Salamo 51:1-14). Kanefa io tapany amin’ny fiainany io dia manampy antsika hahatakatra fa matoa ny olona manao ratsy, dia matetika satria mamelona fanirian-dratsy ao am-pony izy. Noho izany, dia tokony haka fianarana amin’ny loza nanjo an’i Davida isika, mba hanalavirana ny tarehin-javatra, ny zavatra atao sy ny fialam-boly izay manaitra “ny firehetam-po”. — Kolosiana 3:5; I Tesaloniana 4:3-5.