Nirahin’i Jehovah Hitory i Jeremia

Nofidin’i Jehovah ho mpaminany tany Joda i Jeremia. Nasainy nitory izy, dia hampitandrina ny olona hoe tsy tokony hanao ratsy intsony ry zareo. Hoy anefa i Jeremia: ‘Izaho ange Jehovah mbola kely e! Tsy mahay miresaka amin’olona izany aho!’ Dia hoy i Jehovah: ‘Aza matahotra. Ao fa hampiako ianao dia hoteneniko anao izay tokony hoteneninao.’

Nasain’i Jehovah hiantso an’ireo anti-panahy i Jeremia, dia hanapotika siny tanimanga kely iray eo anatrehan-dry zareo sady hiteny hoe: ‘Hopotehina hoatr’izao i Jerosalema.’ Tezitra be ireo anti-panahy ireo rehefa nanao an’izany i Jeremia. Nikapoka azy ny mpisorona atao hoe Pasora, dia nataony tsy afa-nihetsika tamin’ny gadra hazo ny tongony sy ny tanany nandritra ny alina manontolo. Novahan’i Pasora izy ny ampitso. Dia hoy i Jeremia: ‘Tsy zakako izao ka! ’Zaho tsy hitory intsony.’ Dia tena izay tokoa ve no nataony? An an an! Rehefa tena nieritreritra izy, dia hoy izy: ‘Hoatran’ny afo mirehitra ato anatiko ny tenin’i Jehovah. Tsy vitako izany hoe tsy mitory izany.’ Nitory foana ihany àry izy.

Olon-kafa indray no lasa mpanjakan’ny Joda tatỳ aoriana. Tsy tian’ny mpisorona sy ny mpaminany sandoka mihitsy tamin’izany ny zavatra notorin’i Jeremia. Dia hoy ry zareo tamin’ny andriana: ‘Mendrika ny ho faty i Jeremia!’ Hoy anefa i Jeremia: ‘Raha mamono an’ahy ianareo, dia mamono olona tsy manan-tsiny. Tenin’i Jehovah ange no toriko e!’ Rehefa naheno an’izany ireo andriana, dia niteny hoe: ‘Tsy tokony hovonoina ho faty izy.’

Mbola nitory foana i Jeremia. Tezitra be àry ireo andriana, ka niteny tamin’ny mpanjaka hoe tokony hovonoina izy. Dia navelan’ny mpanjaka hanao izay tiany hatao tamin’i Jeremia ry zareo. Natsipin-dry zareo tao anaty lavadrano lalina be feno fotaka àry izy mba ho faty ao. Dia nihanilentika tao anatin’ilay fotaka i Jeremia.

Soa ihany fa nisy mpiasan’ny mpanjaka, atao hoe Ebeda-meleka, niteny tamin’ny mpanjaka hoe: ‘Natsipin’ny andriana ao anaty lavadrano ange i Jeremia e! Ho faty izy raha avela ao.’ Dia nasain’ny mpanjaka nitondra 30 lahy i Ebeda-meleka mba hisintona an’i Jeremia avy tao. Hita mihitsy hoe tsy nisy na inona na inona navelan’i Jeremia hisakana azy tsy hitory. Tokony hanao hoatran’azy koa isika, sa tsy izany?