Nandeha teo Ambony Rano i Jesosy

Nahavita nanasitrana ny marary sy nanangana ny maty i Jesosy. Vitany koa anefa ny nibaiko ny rivotra sy ny orana. Rehefa avy nivavaka teny an-tendrombohitra izy, dia hitany hoe nisy tafio-drivotra be teny amin’ny Ranomasin’i Galilia. Tao anaty sambokely ny apostoliny, ary sahirana be ry zareo nivoy an’ilay izy satria nifofofofo be ny rivotra. Dia nidina avy any an-tendrombohitra i Jesosy, ka nandeha teo ambony rano nankeny amin-dry zareo. Mba ahoana izao hoy ny apostoly rehefa nahita hoe iny fa misy olona mandeha eo ambony rano? Natahotra be ry zareo! Hoy anefa i Jesosy: ‘Izaho ihany ity fa aza matahotra!’

Dia hoy i Petera: ‘Tompo ô, asaivo mankeny aminao aho raha tena ianao io.’ Hoy i Jesosy: ‘Avia àry e!’ Sahy niala tao anaty sambo i Petera, dia nandeha teo ambony rano nankeny amin’i Jesosy. Nijery an’ilay tafio-drivotra anefa izy rehefa akaiky azy, dia lasa natahotra. Tsapany hoe nanomboka nilentika izy. Dia niantsoantso izy hoe: ‘Vonjeo aho Tompo ô!’ Noraisin’i Jesosy àry ny tanany sady hoy izy: ‘Fa maninona ianao no lasa nisalasala sy tsy ampy finoana?’

Niakatra tao anaty sambo i Jesosy sy Petera, ary tonga dia nijanona ilay tafio-drivotra. Dia ahoana hoy ny apostoly nahita an’izany? Hoy ry zareo: ‘Tena Zanak’Andriamanitra marina ianao!’

Tsy tamin’iny ihany i Jesosy no nanao hoatr’izany. Nandeha sambo izy sy ny apostoly, indray mandeha, ary natory tao aoriana i Jesosy. Nisy tafio-drivotra be avy eo. Nanonja be ny ranomasina, ary tafiditry ny rano ilay sambo. Nofohazin’ny apostoly i Jesosy, dia hoy ry zareo: ‘Mpampianatra ô, ho faty isika androany! Mba ampio izahay!’ Nifoha i Jesosy dia niteny tamin’ny ranomasina hoe: “Mangìna!” Tonga dia tony ny ranomasina sy ny rivotra. Hoy i Jesosy avy eo: ‘Fa maninona ianareo no tsy ampy finoana?’ Dia nifampiresaka ry zareo hoe: ‘Na ny rivotra sy ny ranomasina aza ve rangahy manaiky an’azy!’ Lasa fantatry ny apostoly hoe raha tena natoky an’i Jesosy ry zareo, dia tsy nisy na inona na inona tokony hatahorany.