ANTOKON-KINTANA ASHA

Resahina miaraka amin’ny masoandro, kintana, ary lanitra ny teny hebreo hoe ʽAsh sy ʽAyish ary ny hafa, ao amin’ny Joba 9:7-9 sy 38:32, 33. Manondro antokon-kintana eny amin’ny lanitra àry ireo teny ireo. Tsy fantatra marina ankehitriny ny antokon-kintana tiana holazaina amin’ny hoe antokon-kintana Asha. Aleo mandika an’ireo litera hebreo, ka miantso azy io hoe Asha, toy izay hampiasa anarana toy ny hoe “Arcturus” (gr.: Arktorôs, a.b.t.: Mpiambina ny Orsa) (KJ), na hoe “Bera” (Prot.; JM), na koa “Orsa” (Kat.; DIEM).

Lazain’ny Joba 38:32 hoe miaraka amin’ireo “zanany” ny Asha, ka vao mainka izany manaporofo fa antokon-kintana izy io. Olona maro matetika no mihevitra azy io ho ny Ursa Major (Orsa Lehibe), satria misy kintana lehibe fito ao anatiny, ary azo lazaina hoe “zanany” ireo. Ny fanontaniana ao amin’ilay andinin-teny anefa no zava-dehibe, fa tsy ilay antokon-kintana. Izao ilay fanontaniana: “Mahatarika ny antokon-kintana Asha sy ny zanany ve ianao?” Tian’i Jehovah Andriamanitra hiaiky i Joba hoe tena hendry sy mahery ny Mpamorona, ary tena tsy vitan’ny olombelona mihitsy ny mitarika an’ireny antokon-kintana lehibe ireny.