ANTOKON-KINTANA KESILA

(Kesìla) [heb.: kesil: “adala” na “tsisy saina”].

Midika hoe “adala” na “tsisy saina” io teny io matetika. (Ampit. Sl 49:10; 92:6; Oh 1:22.) Ampiasaina hilazana andian-kintana koa anefa izy io, ao amin’ny Jb 9:9; 38:31; Am 5:8 ary Is 13:10 (amin’ny endriny milaza maro). Ny teny manodidina no ahalalana izany.

Maro no mihevitra fa ilay antokon-kintana Orion, antsoina koa hoe ilay mpihaza, izy io. Antokon-kintana tena lehibe misy an’ireo kintana goavana atao hoe Bételgeuse sy Rigel io Orion io. Nadikan’ny Vulgate latinina hoe Orion ny kesil, ao amin’ny Joba 9:9 sy Amosa 5:8. Nanao toy izany koa ny Baiboly maro satria nihevitra fa i Orion tokoa ny kesil. Ny hoe “goavana” kosa no hita ao amin’ny dikan-teny samihafa toy ny Targoma sy ny Syriàka. Mifanaraka amin’ny anarana hoe gabbar, izay iantsoan’ny Arabo ny Orion, izany. Midika hoe “ilay matanjaka” (heb.: gibbôhr) mantsy ny hoe gabbar. Misy koa Baiboly (Prot., Kat.) miantso an’io antokon-kintana io hoe Telonohorefy.

Miresaka momba ny antokon-kintana Kesila koa ny Amosa 5:8. Hita amin’ny teny manodidina an’io andininy io fa nampirisihina ny Israely mba hitady an’i Jehovah, ilay tena Andriamanitra, izay Mpanao an’ireo antokon-kintana eny amin’ny lanitra. Ny Isaia 13:9, 10 indray mampiasa ny hoe kesilehhem (kesil amin’ny endriny milaza maro [na ireo antokon-kintana Kesil]), rehefa miresaka momba izay hitranga amin’ny “andron’i Jehovah.” Amin’izany andro izany, dia haetry ireo mpitondra jadona mirehareha sy miavonavona, ary tsy hamirapiratra intsony ny kintana eny amin’ny lanitra.