BAMOTA-BALA

(Bamota-bàla) [Toerana Avon’i Bala].

Tanàna moabita nitondran’i Balaka mpanjakan’i Moaba an’i Balama mpaminany, mba hahatazanany ny tobin’ny Israely ka hanozonany azy. (No 22:41) Mety ho foiben’ny fivavahana tamin’i Bala sy avo toerana izy io, matoa teny no nofidin’i Balaka hanambarana ilay ozona sy hanaovana sorona. (No 23:1-9) Nomena ho lovan’ny fokon’i Robena i Bamota-bala sy ny tanàna hafa ‘teny amin’ilay lembalemba’ tatỳ aoriana. (Js 13:15, 17) Nilaza i Mesa mpanjakan’i Moaba, tamin’ny voalohandohan’ny taonjato fahasivy T.K., fa naoriny indray i “Beti-bamota satria rava.” (Vato Moabita, andalana faha-27) Toa toerana iray ihany no nantsoina hoe Bamota sy Bamota-bala ary Beti-bamota.​—Ampitahao amin’ny Bala-meona sy Beona ary Beti-bala-meona ao amin’ny lahatsoratra hoe BALA-MEONA.

Teo amin’ny lembalemba avaratratsinanan’ny Ranomasina Maty no nisy an’i Bamota-bala, araka ny fitantaran’ny Baiboly. Tsy azo antoka anefa hoe taiza marina izy io, na dia misy aza mihevitra fa i Kirbet Koveijiya izy io, 14 km eo ho eo atsinanan’ny Ranomasina Maty, akaikin’ny Tendrombohitra Nebo angamba.