KALSEDOANINA

(kalsedoànina).

Karazana vatokaranana (quartz) feno kristaly faran’izay madinika ny kalsedoanina maoderina. Mangarahara na tantera-pahazavana izy io, ary atao ravaka sy haingo. Tsy tena mafy izy io raha oharina amin’ny vatokaranana tsy misy fangarony. Ahitana betsaka aminy any anaty lavadavaky ny vato avy amin’ny volkano. Tsy tena mangarahara kosa ny karazana kalsedoanina mahazatra, ary misy soritsoritra na tasy fotsy toy ny ronono eo aminy. Misy ny kalsedoanina fotsy, volondavenona, mavo, manga, ary volontsôkôlà.

Matetika no nanaovana firavaka nisy sokitra ny kalsedoanina, fahiny. Avy amin’ny anaran’ilay tanàna grika tranainy hoe Chalcédoine (any Azia Minora) ny anaran’io vato io, satria tany no nitrandrahana azy io taloha. Indray mandeha no hita ao amin’ny Baiboly ny hoe kalsedoanina (gr.: kalkedôn), rehefa miresaka momba ilay vato fototra fahatelo amin’ny mandan’i Jerosalema Vaovao.​—Ap 21:2, 19; jereo FIRAVAKA SY VATOSOA.