ELIEZERA
(Eliezèra) [Ny Andriamanitro dia Mpanampy].
1. Lehilahy avy any Damaskosy, izay ho mpandova an’i Abrahama raha tsy niteraka izy. “Mpanompo iray ao amin’ny ankohonako” no nilazan’i Abrahama azy io. (Ge 15:2, 3) Nihevitra azy ho mpandova i Abrahama. Manampy antsika hahatakatra izany ny zavatra hitan’ny mpikaroka, toy ireo takelaka tanimanga hita tany Nouzi. Fanaon’ny mpivady tsy niteraka ny nanangana zanakalahy mba hikarakara azy amin’ny fahanterany sy hikarakara ny fandevenana azy, ary handova ny fananany avy eo. Nisy fepetra anefa izany, satria raha miteraka lahy izy mivady aorian’ny nananganany an’ilay zaza, dia ilay zanany naterany no ho tena mpandova azy.
Azo inoana fa i Eliezera ilay resahina hoe mpanompon’i Abrahama zokiny indrindra sy niandraikitra ny tao an-tranony. Nirahin’i Abrahama ho any amin’ny ankohonan’i Nahora tany Mezopotamia Avaratra izy io mba haka vady ho an’i Isaka. Nanahaka an’i Abrahama tompony izy ka nitady ny tari-dalan’i Jehovah ary nahay namantatra ny fitarihany.—Ge 24:2, 4, 12-14, 56.
2. Ny zandriny amin’izy roa lahy zanak’i Mosesy. Nantsoiny hoe Eliezera izy io, satria Andriamanitra no mpanampy an’i Mosesy ka namonjy azy tsy ho azon’ny sabatr’i Farao. (Ek 18:4) Nanan-janaka lahitokana atao hoe Rehabia i Eliezera, ary avy tamin’io no nananany taranaka maro. Anisan’ireny i Selomota sy ny rahalahiny, izay notendrena hiandraikitra ny zava-drehetra nohamasinina, tamin’ny andron’i Davida.—1Ta 23:17; 26:25, 26, 28.
3. Zanakalahin’i Bekera ary taranak’i Benjamina.—1Ta 7:6, 8.
4. Iray amin’ireo mpisorona fito nitsoka mafy ny trompetra teo anoloan’ny Vata masin’i Jehovah, rehefa nampanalain’i Davida avy tao an-tranon’i Obeda-edoma ilay vata mba hoentina hiakatra tany Jerosalema.—1Ta 15:24.
5. Zanakalahin’i Zikry, ary mpitarika ny fokon’i Robena nandritra ny fanjakan’i Davida.—1Ta 27:16.
6. Zanakalahin’i Dodavaho avy any Maresa. Mpaminany izy, ary nanambara mialoha fa horavan’i Jehovah ny zava-bitan’i Josafata, izany hoe ireo sambo vitany noho izy niombon-draharaha tamin’i Ahazia mpanjaka ratsy fanahy.—2Ta 20:35-37; 1Mp 22:48.
7. Iray amin’ireo lohandohany teo amin’ireo olona niverina tany Jerosalema niaraka tamin’i Ezra, rehefa avy natao sesitany.—Ezr 8:16.
8. Mpisorona avy amin’ny “taranak’i Jesoa.” Anisan’ireo nanaraka ny fampirisihan’i Ezra izy ka nampanantena fa handroaka ny vadiny hafa firenena.—Ezr 10:18, 19.
9. Levita anisan’ireo lehilahy nandroaka ny vadiny hafa firenena, ho fanarahana ny fampirisihan’i Ezra.—Ezr 10:23, 44.
10. Taranak’i Harima, ary anisan’ireo nanaraka ny tenin’i Ezra ny amin’ny tokony handroahana ny vadiny hafa firenena.—Ezr 10:31, 44.
11. Iray amin’ireo razamben’i Maria, renin’i Jesosy tetỳ an-tany.—Lk 3:29.