EMIMA

(Emìma) [Zavatra Mampahatahotra].

Foko na firenena nonina tany atsinanan’ny Ranomasina Maty. Voalaza fa mahery sy maro an’isa ary lava “toy ny Anakita” izy ireo. (De 2:10) Goavam-be sy mahery setra ny Emima, matoa nilaza tamin’ny Israely i Mosesy hoe: “Efa renao izay voalaza momba azy hoe: ‘Iza no mahatohitra ny taranak’i Anàka?’” (De 9:2) Tsy tena fantatra ny razamben’ireo Emima, na dia misy aza mihevitra fa avy amin’ny Refaima izy ireo.

Resin’i Kedorlaomera mpanjaka elamita ny Emima tao Save-kiriataima, tamin’ny andron’i Abrahama. (Ge 14:5) Toa mbola nonina tany atsinanan’ny Ranomasina Maty ihany ny Emima taorian’izay, matoa milaza ny Baiboly fa tatỳ aoriana izy ireo vao noroahin’ny Moabita niala tany. Nantsoin’ny Moabita hoe Emima koa ny Refaima.​—De 2:11.