EVILA-MERODAKA

(Evìla-merodàka) [avy amin’ny teny babylonianina, ary midika hoe “Mpivavaka Amin’i Mardoka”].

Ilay mpanjaka nandimby an’i Nebokadnezara tao Babylona, tamin’ny 581 T.K. Tsara fanahy tamin’i Joiakina mpanjakan’ny Joda i Evila-merodaka, ka nanafaka azy tao am-ponja, tamin’ny taona faha-37 nanaovana sesitany azy tany Babylona. Nomen’i Evila-merodaka toerana ambony kokoa noho ny an’ny mpanjaka babo hafa rehetra tany Babylona izy. (2Mp 25:27-30; Je 52:31-34) Nilaza i Josèphe fa mpinamana be i Evila-merodaka sy Joiakina.

Nahita porofo ny mpikaroka fa tena nisy i Evila-merodaka (Avila-Mardoka, Amila-Mardoka). Nisy soratra toy izao, ohatra, ny vazy iray hita tany akaikin’i Sosa: “Lapan’i Amila-Mardoka, mpanjakan’i Babylona, izay zanakalahin’i Nebokadnezara, mpanjakan’i Babylona.” (Vokatry ny Fikarohana Natao Tany Sosana, frantsay, nataon’i V. Scheil, Paris, 1913, Boky Faha-14) Nilaza i Bérose, araka ny fitantaran’i Josèphe, fa nanjaka roa taona i Evila-merodaka. I Josèphe kosa nilaza hoe nanjaka 18 taona izy. Nisy nitetika ny hamono, hono, izy, ka maty, ary i Neriglisara (Nergala-sarezera) indray no nandimby azy. Tsy misy porofo azo antoka anefa manamarina izany.