GABRIELA

(Gabrièla) [Ilay Tomadin’Andriamanitra].

Hany anjely voalaza anarana ao amin’ny Baiboly ankoatra an’i Mikaela. Izy koa no hany anjely nitafy nofo nilaza ny anarany. Indroa i Gabriela no niseho tamin’i Daniela. Voalohany, teo amoron’ny Reniranon’i Olay “tamin’ny taona fahatelo nanjakan’i Belsazara”, mba hanazava taminy hoe iza ilay osilahy sy ilay ondrilahy hitany tao amin’ny fahitana. (Da 8:1, 15-26) Faharoa, “tamin’ny taona voalohany nanjakan’i Dariosy” Medianina, mba hanambara ilay faminaniana momba ireo “fitopolo herinandro.” (Da 9:1, 20-27) I Gabriela koa no nirahina hilaza ilay vaovao tsara tamin’i Zakaria mpisorona hoe hiteraka zazalahy atao hoe Jaona (Mpanao Batisa) izy sy Elizabeta, izay efa be taona. (Lk 1:11-20) Hoy koa i Gabriela tamin’i Maria, ilay virjiny fofombadin’i Josefa: “Arahaba, ry ilay ankasitrahana indrindra. Jehovah momba anao.” Nilazany koa izy fa hiteraka zazalahy atao hoe Jesosy. “Hantsoina hoe Zanaky ny Avo Indrindra” izy io, “ary i Jehovah Andriamanitra hanome azy ny seza fiandrianan’i Davida rainy ... ary tsy hifarana mihitsy ny fanjakany.”​—Lk 1:26-38.

Anjely mitana toerana ambony any an-danitra i Gabriela. Lazain’ny Baiboly mantsy fa “mitsangana eo anatrehan’Andriamanitra” izy, ary ‘nirahiny’ hampita hafatra manokana tamin’ny mpanompony tetỳ an-tany. (Lk 1:19, 26) “Toy ny lehilahy tomady” tokoa izy, araka ny hevitry ny anarany, rehefa nitafy nofo sy hita tao amin’ny fahitana.​—Da 8:15.