Jesosy, ny fiainany sy ny fanompoany

Hafatra avy any an-danitra

HAFATRA avy any an-danitra ny Baiboly manontolo, satria ny Raintsika any an-danitra no nanome azy ho fampianarana antsika. Efa ho 2 000 taona teo ho eo anefa izay, dia nisy hafatra manokana roa lehibe indrindra nampitain’i Gabriela, anjely “izay mitsangana eo anatrehan’Andriamanitra”. Aoka hojerentsika izay nitarika azy ho eto an-tany tamin’ireo fotoana roa ireo.

Eo amin’ny taona 3 alohan’ny fanisan-taona iraisana isika. Tany amin’ireo havoan’i Jodia, tsy isalasalana fa tsy lavitra loatra an’i Jerosalema, no nonenan’ny mpisoron’i Jehovah iray nantsoina hoe Zakaria. Efa antitra izao io lehilahy io sy Elizabeta vadiny, ary tsy niteraka izy ireo. Rehefa tonga ny anjarany, dia nankany Jerosalema i Zakaria mba hanao ny raharahan’ny mpisorona tao amin’ny tempolin’Andriamanitra. Tamin’izay i Gabriela no niseho tampoka teo ankavanan’ny alitara fandoroana ditin-kazo manitra.

Natahotra mafy i Zakaria. Nanome toky azy anefa i Gabriela ka nilaza taminy hoe: ‘Nohenoina ny fangatahanao. Hiteraka zazalahy aminao Elizabeta, ka Jaona no hataonao anarany. Hamboatra firenena voaomana ho an’i Jehovah izy.’ Gaga i Zakaria. Tsy nino izy fa mbola afaka hiteraka izy sy Elizabeta eo amin’ny taonan’izy ireo. Koa nanampy teny toy izao i Gabriela: ‘Noho ny tsy ninoanao ny teniko, dia ho moana ianao mandra-pahatanterak’izany.’

Nandritra izany fotoana izany, ireo izay niandry tao ivelany dia nanomboka nanontany tena hoe nahoana i Zakaria no tratra aoriana tao amin’ny tempoly. Rehefa nivoaka izy tamin’ny farany tamin’ny fanaovana baiko moana satria tsy afaka nilaza hevitra tamin’ny fomba hafa, dia takatry ny olona rehetra fa vao avy nahita zavatra nahagaga izy.

Rehefa nahatapitra ny vanim-potoam-panompoany tao amin’ny tempoly i Zakaria, dia nody tany an-tranony. Fotoana fohy taorian’izany, dia tanteraka izay nambaran’ilay anjely: Nitoe-jaza i Elizabeta! Teo am-piandrasana ny fahaterahana, dia nijanona tao an-tranony izy, niery nandritra ny dimy volana.

Indro anefa fa niseho indray i Gabriela. Tamin’io indray mitoraka io izy dia niresaka tamin’ny zazavavy iray nantsoina hoe Maria, avy any Nazareta. Hafatra inona no nentiny ho azy? ‘Hanana anaka ianao ka hiteraka zazalahy ary ny anarany hataonao hoe Jesosy, hoy izy taminy. Ho mpanjaka lehibe izy io, ary ny fanjakany tsy hanam-pahataperana.’

Tsy isalasalana fa nankamamy ny asa nankinina taminy i Gabriela. Rehefa mamaky izay hampahafantarin’ireo nomerao manaraka amin’ity gazety ity antsika momba an’i Jaona sy Jesosy isika dia hahatakatra tsaratsara kokoa hoe nahoana ireo hafatra avy any an-danitra ireo no zava-dehibe tokoa. II Timoty 3:16; Lioka 1:5-33.

◆ Inona avy moa ireo hafatra roa lehibe avy any an-danitra?

◆ Iza no nampita ireo hafatra ireo? Natao ho an’iza izany?

◆ Nahoana no sarotra ninoana ireo hafatra roa ireo?