HARA

(Hàra).

Anisan’ny toerana nandefasan’i Tilgato-pilnesera (Tiglato-pilesera III) mpanjakan’i Asyria an’ireo Israelita nataony sesitany. (1Ta 5:26) Miresaka an’ireny toerana ireny ihany ny 2 Mpanjaka 17:6; 18:11, rehefa mitantara fa nisy Israelita hafa nalefan’ny Asyrianina sesitany tatỳ aoriana. Milaza anefa ny soratra nataon’ny Masoreta hoe “tany amin’ireo tanànan’ny Medianina” izy ireny no nalefa, fa ny Fandikan-teny Grikan’ny Fitopolo kosa milaza hoe “tany amin’ireo tendrombohitry ny Medianina.” Manam-pahaizana maro no milaza fa mety ho ilay ao amin’ny Fandikan-teny Grikan’ny Fitopolo no marina kokoa, satria rehefa voaesotra tsy nahy ilay hoe “ny Medianina” dia lasa anaran-tsamirery ilay “Hara” resahin’ny 1 Tantara 5:26 (Haraʼ mantsy no mety ho teny aramianina mifanitsy amin’ny teny hebreo [har] midika hoe “tendrombohitra”). Raha marina izany, ny hoe “Hara” dia mety hanondro ny “tendrombohitry ny Medianina” tany atsinanan’ny lohasaha misy ny Reniranon’i Tigra. Misy kosa milaza fa ny hoe “Hara” dia mety ho teny fampiasa momba ny faritra be tendrombohitra any Torkia, satria mihevitra izy ireo hoe tsy renirano fa toerana ilay Gozana resahin’ny 2 Mpanjaka 17:6 sy 18:11 (toy ny ao amin’ny DIEM).