HIERAPOLIA

(Hierapôlìa) [Tanàna Masina].

Tanàna tao amin’ny faritanin’i Azia. Teo amin’ny sisiny avaratry ny Lohasahan’i Lycus any Azia Minora no nisy azy io, tokony ho 10 km tany avaratr’i Laodikia any Pamukkale ankehitriny, any Torkia.

Toa tsy tany Hierapolia mihitsy ny apostoly Paoly. Azo inoana anefa hoe nisy vokany “tany amin’ny faritr’i Azia” manontolo ny fitoriany tao Efesosy (nanomboka tamin’ny ririnina taona 52/53 ka hatramin’ny Pentekosta taona 55 [1Ko 16:8]). (As 19:1, 10) Toa ny “ezaka” nataon’i Epafra no nampisy ny Fivavahana Kristianina tany Hierapolia.​—Kl 4:12, 13.

Na dia tsy nalaza teo amin’ny sehatry ny fitondrana aza i Hierapolia, dia lasa tanàna niroborobo tamin’ny fotoana nilamina nandritra ny fitondrana romanina, satria tao no nisy ny foiben’ny fivavahana tamin’i Cybèle. Ankoatra ny fivavahana tamin’io andriamanibavy io, dia teo koa ireo loharanon-dranovisy tao sy ilay nantsoina hoe Plotonioma na Charon, lavaka lalina sady tery kely izay nivoahan’ny gazy mahafaty.