ITORIA

(Itorìa).

Faritra kely tany avaratratsinanan’ny Ranomasin’i Galilia. Niovaova ny sisin-tanin’izy io, ka tsy voafaritra tsara.

Toa avy amin’ny anaran’i Jetora zanakalahin’i Ismaela no niavian’ny hoe Itoria. Nonina tany atsinanan’ny Reniranon’i Jordana ny taranak’i Jetora, ary resin’ny Israelita. (Ge 25:15, 16; 1Ta 1:31; 5:18-23) Nandresy an’i Itoria i Aristobolo I, mpanjaka makabeo tany amin’ny faramparan’ny taonjato faharoa T.K. Nisy ampahany lehibe tamin’i Itoria nalainy ary nataony ho anisan’ny faritanin’i Joda. Tsy maintsy noforana sy nanaraka ny lalàna jiosy ireo mponin’i Itoria vao nahazo nijanona tao amin’ilay tany. (Rakitry ny Ela Jiosy, XIII, 318 [xi, 3]) Tatỳ aoriana izy io dia lasa anisan’ny faritra niandraiketan’i Filipo, sady nolovany avy tamin’i Heroda Lehibe, rainy.​—Lk 3:1.