JEDAIA
(Jedaià).
Anarana hebreo roa samy nadika hoe Jedaia, nefa samy hafa ny fanoratra azy sy ny heviny.
[1, 2: Heb.: Yedayah]
1. Simeonita razamben’i Ziza, izay mpiadidy fony nanjaka i Hezekia.—1Ta 4:24, 37, 38, 41.
2. Zanakalahin’i Haromafa nanamboatra ny manda tandrifin’ny tranony tao Jerosalema, taorian’ny sesitany.—Ne 3:10.
[3, 4, 7-10: Heb.: Yedaʽyah, Mahalala i Jah]
3. Fianakaviamben’ny mpisorona voafidy tamin’ny antsapaka ho fizarana faha-2 tamin’ireo antoko 24 nizaran’i Davida ny mpisorona.—1Ta 24:1, 6, 7.
Ireto avy no Jedaia mpisorona taorian’ny sesitany, ka azo inoana fa anisan’ny fianakaviamben’ny mpisorona iray ihany ny sasany, nefa sarotra ny mamantatra izany:
4. Mpisorona iray na koa maromaro anisan’ny fianakaviamben’ny mpisorona voalaza etsy ambony, izay nody avy tany Babylona ary nonina tao Jerosalema. Toa nampian’ny mpanao dika soratra ilay hoe “zanak’i” ao amin’ny Nehemia 11:10, rehefa jerena ny 1 Tantara 9:10. Samy anarana fianakaviambe tamin’ny andron’i Davida (1Ta 24:6, 7, 17) ny hoe Jedaia sy Joariba (na Joiariba) ary Jakina, eo am-piandohan’ny lisitra ao amin’ny Nehemia sy Tantara. Mety ho anarana fianakaviambe na ny solontenany àry izy telo ireo, fa anaran-tsamirery kosa ireo anarana ao aorian’izy ireo. Na koa mety ho anaran’ny olona velona tamin’izany ny anarana rehetra tanisaina ao.—1Ta 9:10-12; Ne 11:10-13.
[5, 6: mety hidika hoe Ho Faly Anie i Jehovah]
5. Nantsoina hoe Jedaia ny Levita iray (na ny fianakaviambe avy amin’ny rainy), ary taranak’i Amrama izy. Anisan’ireo voakasika izy rehefa nandamina ny Levita i Davida.—1Ta 24:20, 31.
6. Meronotita niandraikitra an’ireo ampondravavin’i Davida Mpanjaka.—1Ta 27:30.
7. Razamben’ny mpisorona 973 niara-nody tamin’i Zerobabela avy tany Babylona. (Ezr 2:1, 2, 36; Ne 7:39) Azo inoana fa anisan’ilay fianakaviambe No. 3 izy ireo, nefa koa mety ho taranaky ny mpisoronabe matoa ‘avy tamin’ny ankohonan’i Jesoa.’
8, 9. Mpisorona roa anisan’ireo niara-niverina tamin’i Jesoa sy Zerobabela (537 T.K.). (Ne 12:1, 6, 7) Samy fianakaviambe ireo Jedaia roa ireo, ka i Ozy no lohan’ny iray ary Netanela no lohan’ny iray, fony i Joiakima no mpisoronabe nandimby an’i Jesoa. (Ne 12:12, 19, 21) Tsy fantatra raha misy ifandraisany amin’ny fianakaviambe No. 3 ny Jedaia iray na izy roa.
10. Anisan’ireo nody avy tany an-tsesitany nakana volamena sy volafotsy, mba hanaovana satroboninahitra ho an’i Josoa Mpisoronabe. (Za 6:10-14) Tsy voalaza raha misy ifandraisany amin’ireo mpisorona etsy ambony izy na tsia.