TRANON’NY RAY
Maro ny hevitr’ilay teny hebreo hoe beht ʼav (mr.: beht ʼavôht): 1) Trano fonenana (De 22:21), 2) ankohonan’ny raim-pianakaviana niara-nonina taminy (Ge 31:30; 38:11), 3) ireo anisan’ny ankohonana, na dia tsy mipetraka ao amin’ny tranon-drazana aza (Ge 46:31; Mpts 9:18), ary 4) “ankohonan-dray”, “fianakaviana”, “fianakaviambe” izay nisy fianakaviana maromaro indraindray. Fianakaviana efatra, ohatra, no nisaina ho anisan’ny fianakaviamben’i Kehata, tamin’ny fanisam-bahoaka tany an-tany efitra. (No 3:19, 30; jereo koa Ek 6:14; No 26:20-22; Js 7:17.) Fianakaviambe maromaro no lasa foko iray. Anisan’ny fokon’i Levy, ohatra, ny fianakaviamben’i Gersona sy Kehata ary Merary.
Tsy ireo voalaza eo ambony ireo ihany anefa no dikan’ny hoe “tranon-dray”, na “fianakaviambe”, na “ankohonan-dray”, sy ny toy izany. (Jereo ny No 17:2, 6. Malalaka kokoa ny hevitry ny hoe “fianakaviambe” ao, ary midika hoe foko.)
Nihabetsaka ireo fianakaviambe rehefa nitombo ny Israelita ka nanjary nisy mponina ny toerana maro tao amin’ny Tany Nampanantenaina. Nozarain’i Davida ho antokony 24 ireo mpisorona, araka ny fanompoana niandraiketany avy sy arakaraka ny fianakaviamben’ireo rainy, izany hoe fizarana 16 ho an’i Eleazara, ary fizarana 8 ho an’i Itamara. Nantsoina hoe “lohan’ireo fianakaviambe” ireo filoha 24. (1Ta 24:4-6) Nomena andraikitra hafa ny Levita ambiny, ka antsapaka no nanaovana izany fa tsy arakaraka ny taonan’ireo lohan’ny fianakaviambe.—1Ta 24:20-31.
Ny lohan’ny fianakaviambe no nisolo tena ny fianakaviambe tsirairay, rehefa nisy raharaha sy fitsarana. (Ne 7:70, 71; 11:13) Toa niditra tao an-tokotanin’ny tempoly arakaraka ny fianakaviambeny ny vahoaka mba hanolotra sorona, rehefa nankalaza ny Paska izy ireo tamin’ny andron’i Josia Mpanjaka. Nozaraina araka ny fianakaviambeny avy ny Levita, ary araka ny fizarana nisy azy ireo no nandraisany ny sorona nentin’ny vahoaka sy nanomanany izany.—2Ta 35:4, 5, 12.
Nampanantena an’ireo mpanara-dia azy i Jesosy Kristy fa handeha hanomana toerana ho azy ireo ao ‘an-tranon’ny Rainy’ izy. Ny lanitra fonenan’i Jehovah no tiany holazaina amin’izany.—Jn 14:2; jereo FIANAKAVIANA.