JERAMELITA

(Jeramelìta) [An’i Jeramela].

Ireo taranak’i Joda avy tamin’i Jeramela zanakalahin’i Hezrona. (1Ta 2:4, 9, 25-27, 33, 42) Nipetraka tany amin’ny faritra atsimo amin’i Joda ny Jeramelita. Taiza ho aiza marina izany? Toa tao amin’ny faritra midadasika nonenan’ny Amalekita sy ny Gesorita ary ny Girzita, izany hoe ireo mponina notafihin’i Davida tamin’izy mbola niara-nipetraka tamin’ny Filistinina satria nandositra an’i Saoly Mpanjaka. Rehefa nanontany azy i Akisy mpanjaka filistinina, dia tsy nolazainy hoe taiza marina izy no nanafika, fa nataony fotsiny hoe “tany atsimon’i Joda sy tany atsimon’ny tanin’ny Jeramelita ary tany atsimon’ny tanin’ny Kenita.” Nihevitra àry ilay mpanjaka fa nanafika an’ireo Israelita i Davida ka efa nanjary halan’ny mpiray firenena taminy. Lasa natokisany kokoa izy vokatr’izany. (1Sa 27:7-12) Tatỳ aoriana anefa, dia nozarain’i Davida tamin’ireo anti-panahy “tany amin’ireo tanànan’ny Jeramelita” ny zavatra azony babo.​—1Sa 30:26, 29.