JOHANA

(Johàna) [endriny milaza vavy sady fanafohezana ny hoe Johanana, izay midika hoe “I Jehovah dia Niantra; I Jehovah dia Tsara Fanahy”].

Anisan’ireo vehivavy maromaro nositranin’i Jesosy Kristy ka lasa mpanara-dia azy, ary nampiasa ny fananany hikarakarana an’i Jesosy sy ny mpianany. (Lk 8:1-3) Azo inoana fa anisan’ireo vehivavy nanatrika ny namantsihana an’i Jesosy teo amin’ny hazo fijaliana i Johana. Nanomana zavamaniry mani-pofona sy menaka manitra mba hoentina tany amin’ny fasan’i Jesosy ireo vehivavy ireo, ka anisan’ireo olona voalohany nahafantatra hoe natsangana tamin’ny maty izy. Saika tsy nino anefa ireo apostoly 11 rehefa nitantaran’ireo vehivavy ireo an’izany. (Lk 23:49, 55, 56; 24:1-11) I Koza no vadin’i Johana, ary mpiandraikitra ny tao an-tranon’i Heroda izy.​—Lk 8:3.