NAINA

(Nàina).

Tanàna tany Galilia. Tany i Jesosy Kristy no nanangana tamin’ny maty ny zanaka lahitokan’ny vehivavy mpitondratena iray. (Lk 7:11-17) Maro no milaza an’i Naina ho ny tanàna kelin’i Neina (Naʽim) any avaratrandrefan’i Jebel Dahi (Givʽat Ha-More; havoanan’i More), tokotokony ho 10 km any atsimo atsimoatsinanan’i Nazareta. Io no toerana nolazain’i Jérôme sy Eusèbe fa nisy an’ilay tanàna fahiny. Tena tsara tarehy ny tanànan’i Neina, ary tazana avy eny ny Lemak’i Jezirela (Esdraelona). Misy loharano iray mamatsy rano an’iny toerana iny, ka vokatra be ny oliva sy ny aviavy. Tanàna kely i Neina ankehitriny. Lehibe ihany anefa ilay izy fahiny, raha jerena ilay tanàna rava ao.​—SARY, Boky Faha-2, p. 738.

Tamin’ny taona 31, rehefa nitory voalohany nanerana an’i Galilia i Kristy Jesosy, dia tonga tao Naina, tany akaikin’i Kapernaomy. (Lk 7:1-11) Tokotokony ho 35 km ny elanelan’ireo tanàna roa ireo. Ilay fidiran’ny lalana mankao an-tanàna angamba no lazaina hoe “vavahady”, satria tsy nahitana porofo hoe voahodidina manda ilay tanàna. Toa tany amin’ny fidirana atsinanan’i Naina i Jesosy sy ny mpianany no nihaona tamin’ireo mpandevina, izay angamba ho eny amin’ireo fasana teny amin’ny tehezan-kavoana teo atsimoatsinanan’i Neina ankehitriny. Nangoraka an’ilay mpitondratena tsy nanan-janaka intsony i Jesosy ka nanatona an’ilay filanjana faty, ary nanangana an’ilay zazalahy tamin’ny maty. Niely nanerana an’ilay faritra io fahagagana io, ary tonga hatrany Jodia mihitsy aza. Io zava-nitranga io angamba no tian’i Jesosy holazaina tamin’izy niteny hoe “atsangana ny maty.” Anisan’ny valin-teny nomeny an’ireo iraka nalefan’i Jaona Mpanao Batisa avy tany am-ponja io teniny io.​—Lk 7:11-22.