Jesosy, ny fiainany sy ny fanompoany

Nampionona vehivavy mpitondratena iray tamin’ny fahoriany Jesosy

TAORIANA kelin’ny nanasitranany ny mpanompon’ilay manamboninahitra romana, Jesosy dia nankany Naina, tanàna iray any amin’ny telopolo kilaometatra any atsimo-andrefan’i Kapernaomy. Narahin’ireo mpianany sy vahoaka betsaka izy. Rehefa tokony ho tamin’ny hariva, dia tonga teo akaikin’ny tanàna izy ireo; teo izy dia nifanena tamin’ny laharam-pandevenana iray. Nentina nivoaka ny tanàna ny fatin’ny lehilahy tanora iray mba halevina.

Tao anatin’ny tarehin-javatra nampalahelo manokana ny renin’ilay maty, satria mpitondratena izy ary zanakalahy tokany io. Rehefa maty ny vadiny dia afaka nampahery tena izy tamin’ny filazana anakampo fa mbola teo aminy ny zanany lahy. Nametraka ny fanantenany, ny faniriany ary ny reharehany rehetra tamin’ny ho avin’itsy farany izy. Nefa, hatramin’izao dia tsy manana na iza na iza intsony hampionona azy izy. Lehibe aoka izany ny fahoriany rehefa niaraka taminy ho any amin’ny fandevenana ny olona.

Rehefa nahita io vehivavy io Jesosy dia voatohina noho ny alahelony lalina ny fony. Hoy izy taminy tamim-pahalemem-panahy, ary anefa tamin’ny fomba hentitra nampanana toky: “Aza mitomany.” Nanintona ny sain’ny vahoaka ny fihetsiny sy ny fomba fanaovany zavatra, hany ka nijanona ireo mpilanja rehefa nanatona ny vatam-paty izay nametrahana ny faty izy ary nikasika azy. Nieritreritra marina tokoa izay hataony ny rehetra.

Marina aloha fa ireo izay niara-dàlana tamin’i Jesosy dia efa nahita azy nanasitrana tamim-pahagagana olona marary maro. Toa tsy mbola nahita azy mihitsy nanangana olona iray tamin’ny maty anefa izy ireo. Afaka manao zavatra toy izany ve izy? Nandefa izao baiko izao i Jesosy tamin’ny firesahana tamin’ny fatin’ilay zazalahy tanora: “Ry zatovo, hoy Izaho aminao: Miarena!” Niarina avy hatrany izy! Nanomboka niresaka izy, ary natolotr’i Jesosy ny reniny izy.

Rehefa tsapany fa velona marina ilay zazalahy, dia nihiaka toy izao ny sasany: “Mpaminany lehibe no efa mitsangana eto amintsika.” Nanambara ny sasany hoe: “Andriamanitra efa nitsinjo ny olony.” Niely haingana nanerana an’i Jodia sy ny tany manodidina rehetra an’i Jodia sy ny tany manodidina rehetra ny vaovao momba an’io fihetsika nahatalanjona io.

Mbola any an-tranomaizina foana i Jaona mpanao Batisa. Nampandrenesin’ireo mpianany anefa izy ny amin’ireo zavatra rehetra notanterahin’i Jesosy teo imason’izy ireo. Ahoana no fandraisan’i Jaona izany? Ary inona no lazain’ny olon-kafa maro monina eny amin’ireo toerana nanaovan’i Jesosy ireo fahagagany ny amin’izany? Hamaly an’ireo fanontaniana ireo ny nomerao manaraka. Lioka 7:11-18.

◆ Inona no nitranga raha tonga teo akaikin’i Naina Jesosy?

◆ Inona no tsapan’i Jesosy rehefa nahita io fisehoan-javatra io izy, ary inona no nataony?

◆ Ahoana no fandraisan’ny olona ny fahagagana nataon’i Jesosy?