NETINIMA

(Netinìma) [Ireo Nomena].

Tsy Israelita nanompo tao amin’ny tempoly. (1Ta 9:2; Ezr 8:17) Nisy niara-niverina tamin’i Zerobabela avy tany an-tsesitany tany Babylona (537 T.K.) ny solontenan’ny fianakaviambe netinima 35. (Ezr 2:1, 2, 43-54, 58; Ne 7:46-56, 60; notanisain’i Ezra fa tsy noresahin’i Nehemia ny taranak’i Akoba, Hagaba ary Asna, satria mety ho nitambatra tamin’ny anaran’ny fianakaviambe hafa ny anaran’izy ireo.) Nisy Netinima koa niaraka tamin’i Ezra avy tao Babylona ho any Jerosalema (468 T.K.) (Ezr 7:1-7), ary avy eo nanamboatra ny simba tamin’ny mandan’i Jerosalema. (Ne 3:26) Niara-nanao fifanekena tamin’ny Israelita koa ny Netinima hoe tsy hanambady vehivavy hafa firenena.​—Ne 10:28-30.

Azo inoana fa taranaky ny Gibeonita nataon’i Josoa ‘mpaka kitay sy mpantsaka rano ho an’ny fiangonana sy ny alitaran’i Jehovah’ ny Netinima maro. (Js 9:23, 27) Ny hafa kosa toa taranak’ireo olona nobaboin’i Davida Mpanjaka sy ny andrianany. (Ezr 8:20; ampit. Sl 68:18.) Ny Netinima anisan’ny fianakavian’ny Meonita indray mety ho taranak’ireo olona nobaboin’i Ozia mpanjakan’ny Joda (2Ta 26:7; Ezr 2:50; Ne 7:52), fa ireo “taranak’i Nefosima” kosa mety ho taranak’i Ismaela avy tamin’i Nafisy.​—Ge 25:13-15; Ezr 2:50; Ne 7:52.

Nonina tao Ofela, toa teny akaikin’ny faritra nisy ny tempoly, sy tany amin’ny tanàna hafa ny Netinima, taorian’ny sesitany. (Ezr 2:70; Ne 3:26, 31; 7:73; 11:3, 21) Tsy nampandoavin’i Artaksersesy mpanjakan’i Persa hetra na haba na hetran-dalana izy ireo, satria nanompo tao an-tempoly.​—Ezr 7:24.