OBADIA

(Ôbadìa) [Mpanompon’i Jehovah].

1. Lohan’ny fianakaviambe teo amin’ny fokon’i Isakara. Zanak’i Jizrahia izy, sady taranak’i Tola.​—1Ta 7:1-3.

2. Zebolonita iray. Andriana teo amin’ny fokon’i Zebolona ny zanany lahy, tamin’ny andro nanjakan’i Davida.​—1Ta 27:19, 22.

3. Miaramila gadita matanjaka, izay niampita ny Reniranon’i Jordana tamin’izy io tondraka. Nanohana an’i Davida izy tamin’i Davida nandositra an’i Saoly.​—1Ta 12:8, 9, 14, 15.

4. Mpiandraikitra ny tao an-tranon’i Ahaba Mpanjaka. Olona tena natahotra an’i Jehovah i Obadia, na dia ratsy fanahy aza i Ahaba sy Jezebela. Nasain’i Jezebela naripaka ny mpaminanin’i Jehovah. Nanafina mpaminany 100 anefa i Obadia, ka “dimampolo avy no nataony tao anaty lava-bato.” Nozarain’i Ahaba ny tany hoteteziny sy izay hotetezin’i Obadia, mba samy hitady ahi-maitso ho an’ny biby fiompy izy ireo, nandritra ilay hain-tany avy tamin’Andriamanitra, izay nambaran’i Elia mialoha. Tamin’izay i Obadia no nifanena tamin’i Elia. Tsy nahita an’i Elia mihitsy i Ahaba nandritra an’ilay hain-tany naharitra telo taona teo ho eo. Nasain’i Elia nilaza tamin’i Ahaba i Obadia hoe tafaverina izy. Natahotra be i Obadia, ka tsy nety nandeha raha tsy efa nanome toky azy ilay mpaminany hoe tsy hiala teo. Tsy maintsy ho novonoin’i Ahaba mantsy ilay mpanompony raha tsy hitany teo tokoa i Elia.​—1Mp 18:1-16.

5. Andriana anisan’ireo nirahin’i Josafata hampianatra ny lalàn’i Jehovah tany amin’ireo tanànan’i Joda.​—2Ta 17:7, 9.

6. Taranak’i Saoly sy Jonatana tatỳ aoriana be, tao amin’ny fokon’i Benjamina.​—1Ta 8:33-38; 9:44.

7. Levita Merarita, anisan’ireo niandraikitra ny asa, rehefa nasain’i Josia Mpanjaka namboarina ny simba tao amin’ny tempoly.​—2Ta 34:8, 12.

8. Mpaminanin’i Jehovah, sady nanoratra ny boky fahefatra amin’ireo boky 12 farany ao amin’ny Soratra Hebreo. (Ob 1) Tsy fantatra ny mombamomba an’io mpaminany tamin’ny taonjato fahafito T.K. io.​—Jereo OBADIA, BOKIN’I.

9. Levita niverina avy tany Babylona ary nonina tao Jerosalema. (1Ta 9:2, 3, 14, 16) Abda no iantsoan’ny Nehemia 11:17 azy. Mety ho izy ihany ilay Obadia No. 13.

10. Taranak’i Davida velona taorian’ny sesitany.​—1Ta 3:5, 9, 10, 21.

11. Zanakalahin’i Jehiela, sady lohan’ny fianakaviamben’ny taranak’i Joaba. Izy no nitarika an’ireo 218 lahy tao amin’io fianakaviambe io, tamin’izy ireo nody tany Jerosalema niaraka tamin’i Ezra tamin’ny 468 T.K.​—Ezr 8:1, 9.

12. Mpisorona. Anisan’ireo nanao fifanekena tamin’ny andron’i Nehemia Governora izy na ny taranany. Tamin’izay mantsy ireo niverina avy tany an-tsesitany no nanao fifanekena fa tsy hivadika amin’i Jehovah.​—Ne 9:38; 10:1, 5, 8.

13. Levita mpiandry vavahady tamin’ny andron’i Nehemia sy Ezra. (Ne 12:25, 26) Mety ho izy ihany ilay Obadia No. 9.