TONGOLOBE

[Heb.: batsal].

Zavamaniry misy vodiny sy misy raviny manify toy ny fantsona, masiatsiaka, ary mamoa isaky ny roa taona. Nanembona tongolobe (Allium cepa) sy sakafo hafa ny olona samihafa firenena sy ny Israelita tany an-tany efitra, rehefa nafahana avy tany Ejipta izay nambolena betsaka azy io. (No 11:4, 5) Misy soratra milaza fa anisan’ny sakafo nomena ny mpiasa nanorina piramida iray izy io, hoy i Hérodote (II, 125), Grika mpahay tantara. Natolotra ho an’ireo andriamanitra ny tongolobe (niara-nafatotra matetika) tany Ejipta, ka tsy navela nohanin’ny mpisorona ireny. Malemy, hono, ny tongoloben’i Ejipta ka mora levonina kokoa. Mamy koa izy io, fa tsy masiatsiaka na mangananganana.