FINEHASA
(Finehàsa).
1. Zanakalahin’i Eleazara ary zafikelin’i Arona. Zanakavavin’i Potiela ny renin’i Finehasa, ary Abisoa no anaran’ny zanany lahy. (Ek 6:25; 1Ta 6:4) Nijangajanga sy nanompo an’i Balan’i Peora ny Israely, tamin’i Finehasa mbola tanora. Tezitra i Jehovah ka nandefa loza nahafaty Israelita 24 000, teo amin’ny Lemak’i Moaba. Nentin’i Zimry tao amin’ny tranolainy mihitsy aza i Kosby, vehivavy midianita. Hitan’i Finehasa izany ka nanao zavatra avy hatrany izy: Nolefoniny izy ireo ary “gorobaka hatrany amin’ny taovam-pananahan-dravehivavy.” Izay no nampitsahatra an’ilay loza. ‘Tsy nilefitra mihitsy i Finehasa rehefa nisy nivadika” tamin’i Jehovah. Izany no “nahatonga azy hekena ho isan’ny olo-marina.” Nanao fifanekena i Jehovah hoe ho avy amin’ny taranak’i Finehasa, “mandritra ny fotoana tsy voafetra”, ireo hotendrena ho mpisorona.—No 25:1-3, 6-15; Sl 106:30, 31.
Nanana andraikitra isan-karazany i Finehasa nandritra ny androm-piainany. Izy, ohatra, no solontenan’ny mpisorona tao amin’ilay tafika nampiasain’i Jehovah hampihatra ny famaliany an’ireo Midianina. (No 31:3, 6) Izy koa no nitarika an’ireo olona nanadihady an’ireo foko telo noheverina hoe nivadika tamin’i Jehovah. (Js 22:9-33) Izy no lehiben’ireo mpiandry vavahady niambina ny tranolay masina. (1Ta 9:20) Lasa mpisoronabe izy rehefa voalevina teo amin’ny Havoanan’i Finehasa ny rainy. (Js 24:33; Mpts 20:27, 28) Nisongadina ny anarany tao amin’ireo tetirazana maromaro natao taorian’ny sesitany.—1Ta 6:4, 50; Ezr 7:5; 8:2.
2. Ilay zandriny tamin’izy mirahalahy zanak’i Ely mpisorona. Voalaza hoe “olona tsy manjary” izy sy Hofinia rahalahiny. (1Sa 1:3; 2:12) Mpisorona tao amin’ny toerana masina izy roa lahy, nefa nanao firaisana tamin’ireo vehivavy nanompo tao, ary “nanao tsinontsinona ny fanatitra ho an’i Jehovah.” (1Sa 2:13-17, 22) Nibedy moramora azy roa lahy ny rainy, saingy tsy nohenoiny. Namoaka didim-pitsarana nanamelohana azy roa lahy Andriamanitra noho izy ireo ratsy fanahy. Tanteraka izany rehefa maty tao anatin’ny indray andro izy roa lahy, tamin’ny Israely niady tamin’ny Filistinina. (1Sa 2:23-25, 34; 3:13; 4:11) Ren’ny vadin’i Finehasa fa lasa babo ny Vata masin’Andriamanitra, ary maty ny rafozandahiny sy ny vadiny. Tsy zakany izany ka nihetsi-jaza tampoka izy, ary maty rehefa avy niteraka an’i Ikaboda.—1Sa 4:17-21.
3. Levita iray niteraka an’i Eleazara ary nanampy an’ireo nanao lisitra sy ireo nanisa an’ireo zava-tsarobidy tao amin’ny tempoly, tamin’ny andron’i Ezra, tamin’ny 468 T.K.—Ezr 8:33, 34.