ANKAMANTATRA, TENY SARO-PANTARINA
Filazan-javatra izay tiana hovinanin’ny hafa ny “ankamantatra.” Mety ho azo adika koa hoe “teny saro-pantarina” na “fanontaniana saro-baliana” ny teny hebreo niavian’izy io. (Ampit. Da 8:23.) Mifanohitra amin’ny teny mivantana sy mora azo izy io. (No 12:8) Mifanitsy amin’ny hoe “oha-teny” ny ‘ankamantatra’ indraindray, satria mety hisy heviny lalina saingy tsy lazaina mivantana. (Sl 49:4) Natao koa hoe “fanontaniana saro-baliana” ny teny hebreo nadika hoe “ankamantatra.” (2Ta 9:1) Mila hakingan-tsaina ny fanaovana ankamantatra, izay misy fampitoviana marina tsara saingy tsy lazaina mivantana matetika. Mila hita koa ny ifandraisan’ireo zavatra resahina, vao hay ny valiny. Ny olon-kendry àry no manao ankamantatra ary izay mahira-tsaina no mahazo ny heviny, hoy ny Baiboly.—Oh 1:5, 6.
Teny saro-pantarina indraindray no ilazan’i Jehovah ny fikasany ao amin’ny Baiboly. (Sl 78:2-4) Mety hahavery hevitra ny mpamaky izy ireny, ary mety ho fampitahana mety tsara saingy niniana natao tsy mazava, mba tsy ho azon’olona tamin’ny fotoana nanoratana azy. Miresaka an’ilay ‘mpanompony atao hoe Tsimoka’, ohatra, i Jehovah ao amin’ny Zakaria 3:8. Tsy tonga dia nohazavainy anefa hoe tarana-mpanjaka avy amin’i Davida io tsimoka io, ary io ilay Zanany any an-danitra izay hateraky ny virjiny taranak’i Davida Mpanjaka. Milaza koa ny Apokalypsy 13:18 fa “enina amby enimpolo sy eninjato” ny “isa manondro ny bibidia”, saingy tsy hazavainy ny dikan’ilay isa.
Natao mba hahaliana ny mpihaino sy hanampiana azy hitadidy an’ilay hevitra koa ny ankamantatra, fa tsy natao hovinavinaina foana akory. Toy izany, ohatra, ny ankamantatra momba ny voromahery roa sy voaloboka nataon’i Ezekiela mpaminany tamin’ny taranak’Israely. (Ezk 17:1-8) Vao vita ilay ankamantatra, dia nasain’i Jehovah nanontaniany ny vahoaka raha azon’izy ireo ilay izy, ary avy eo nasaina nohazavainy.
Natao hovalian’ny mpihaino koa ny ankamantatra, izay misy andalana vitsivitsy matetika, toy ilay nataon’i Samsona tamin’ny Filistinina. Ninia nampiasa an’ity fampitahana tsy tonga dia mazava ity izy: “Avy tao amin’ny mpihinana no nivoahan’izay fihinana, ary avy tao amin’ny matanjaka no nivoahan’ny mamy.” (Mpts 14:12-18) Naka tantely navelan’ny renitantely maro be tao amin’ny fatin-diona iray mantsy izy taloha kelin’izay, ka izany no nataony ankamantatra.—Mpts 14:8, 9.