SAFIRA, II

Vatosoa sarobidy mangarahara na tantera-pahazavana ary karazana kôrindona. Misy lokony isan-karazany ny safira, fa ny manga antitra no heverina ho sarobidy indrindra. Azo inoana fa safira manga no resahin’ny Baiboly.

Anisan’ny vatosoa teo amin’ny “saron-tratra fitsarana” nanaovan’ny mpisoronabe ny safira.​—Ek 28:15-18; 39:11.

Nanazava i Joba, izay niaina tamin’ny taonjato faha-17 T.K. tany ho any, fa niezaka hihady lalina tany anaty tany ny olona mba hitrandrahana volamena sy vatosoa, ary niresaka momba ny safira izay vatosoa tsy fahita firy koa izy. Nilaza anefa i Joba fa na sarobidy sy sarotra trandrahina aza ny safira, dia mbola sarobidy lavitra ny fahendrena sady tsy voavidy amin’ny vatosoa toy ireny.​—Jb 28:4-6, 12, 16.

Heviny an’ohatra. Kanto sy mamirapiratra ny vatosoa sarobidy, ary mahafinaritra sy mahavariana ary mahasondriana ny mijery azy. Toy izany koa ny voninahitr’Andriamanitra, araka ny lazain’ireo nahazo fahitana momba izany, anisan’ireny i Mosesy sy Arona, Nadaba sy Abiho, ary 70 lahy tamin’ireo anti-panahin’ny Israely. Nahazo fahitana an’i Jehovah izy ireo taorian’ny nanaovana ny fifaneken’ny Lalàna ka hitany fa “nisy zavatra toy ny safira fisaka natao rarivato, sy toy ny lanitra madio” teo ambanin’ny tongotr’i Jehovah. (Ek 24:8-11) Nahazo fahitana momba ny voninahitr’i Jehovah koa i Ezekiela, ary indroa izy no nahita zavatra “toy ny seza fiandrianana” izay “toy ny vato safira.”​—Ezk 1:1, 26-28; 10:1-4.

I Jehovah no vadin’i Ziona sady Tompony, ary nilaza izy fa haverina ho toy ny taloha sy hatao tsara tarehy izy io. Hoy izy: “Safira no hataoko fototrao.” (Is 54:5, 11) Hitan’ny apostoly Jaona tao amin’ny fahitana koa i Jerosalema Vaovao any an-danitra, ary notantarainy fa anisan’ny vato fototra tamin’izy io ny safira.​—Ap 21:2, 19.