SESBAZARA

(Sesbazàra).

Voatendrin’i Kyrosy Mpanjaka hitarika an’ireo Jiosy nody voalohany avy tany an-tsesitany tany Babylona. Nitondra an’ireo fitaovana volamena sy volafotsy norobain’i Nebokadnezara tao an-tempoly izy, ary nandatsaka ny fototry ny tempoly faharoa izy, rehefa tonga tany Jerosalema.​—Ezr 1:7-11; 5:14-16.

Misy milaza hoe i Zerobabela Governora ihany no Sesbazara, fa misy kosa milaza hoe olon-kafa izy io. I Senazara zanak’i Joiakina Mpanjaka (1Ta 3:18) no Sesbazara, hoy ny sasany, satria mitovitovy ny anaran’izy ireo, ary misy Baiboly milaza hoe “andrianan’ny Joda” (Ezr 1:8, Da, Sg) i Sesbazara. Tsy mitombina anefa izany satria tsy tena mitovy ireo anarana ireo, ary nanan-jo atao hoe “andrianan’ny [“mpiadidy teo amin’ny”, TV] Joda” koa i Zerobabela zafikelin’i Joiakina satria zanaky ny zanany.

Misy manam-pahaizana ankehitriny milaza fa tsy i Zerobabela no Sesbazara. Notendren’i Kyrosy ho governora, hono, i Sesbazara, ary avy eo nodimbiasan’i Zerobabela tamin’ny andron’i Dariosy Mpanjaka, ka i Zerobabela no nanorina ny tempoly.

Toa azo inoana kokoa anefa fa i Zerobabela ihany no Sesbazara, araka ny voalazan’ny ankamaroan’ny manam-pahaizana sy boky. Diniho izao: Izay voalazan’ny andininy roa fa nataon’i Sesbazara, dia resahin’ny andininy hafa hoe nataon’i Zerobabela. Samy natao hoe “governora” koa izy ireo. (Ezr 1:11; 2:1, 2; 5:2, 14, 16; Hg 1:1, 14; 2:2, 21; Za 4:9) I Zerobabela no nitarika an’ireo nody avy tany an-tsesitany, ary tsy hita ao anatin’ny lisitry ny anaran’izy ireo ny hoe “Sesbazara.”​—Ezr 2:2; 3:1, 2.

Toa anarana babylonianina ofisialy nomena an’i Zerobabela àry ny hoe Sesbazara, toy ny natao tamin’i Daniela sy ny hafa. (Da 1:7) Nahazatra kokoa ny Kaldeanina ny hoe “Sesbazara” noho ny hoe “Zerobabela.” Miresaka an’izay voalazan’ny taratasy ofisialy iray ny Ezra 5:14-16, ary miresaka ny didy navoakan’i Kyrosy ny Ezra toko 1, ka mety ho izany no antony nampiasana anarana ofisialy ao amin’ireo andininy ireo.