ZEROBABELA
(Zerobabèla) [avy amin’ny teny akadianina, ary midika hoe “Taranak’i Babela”].
Governora voalohany nifehy ny Jiosy nody an-tanindrazana. (Hg 2:21) Taranak’i Davida Mpanjaka izy, razamben’i Jesosy Kristy, ary azo inoana fa zanak’i Pedaia, fa noheverina ho zanak’i Sealtiela kosa teo anatrehan’ny lalàna. (1Ta 3:19; Mt 1:12, 13; Lk 3:27; jereo TETIRAZAN’I JESOSY KRISTY [Tetirazana nosoratan’i Matio].) Niteraka fito lahy (Mesolama, Hanania, Hasoba, Ohela, Berekia, Hasadia, ary Josaba-heseda), sy vavy iray (Selomita) izy, araka ny tetirazana ao amin’ny 1 Tantara 3:19, 20. Toa Sesbazara no anarany ofisialy na babylonianina.—Ezr 1:8, 11; 5:14, 16; ampit. Ezr 3:8.
Nitarika ny Jiosy niverina tany Jerosalema sy Joda i Zerobabela (537 T.K.), taorian’ny sesitany tany Babylona. (Ezr 2:1, 2; Ne 7:6, 7; 12:1; SARINTANY, Boky Faha-2, p. 332) Notendren’i Kyrosy Mpanjaka ho governora izy, ary notolorana an’ireo fitaovana volamena sy volafotsin’ny tempoly nalain’i Nebokadnezara taona maro talohan’izay. (Ezr 5:14, 15) Nampanorina ny alitaran’ny tempoly tao Jerosalema i Zerobabela sy Jesoa Mpisoronabe (Ezr 3:1, 2) tamin’ny volana fahafito (Etanima na Tisry, Septambra-Oktobra), ary natomboka ny fanorenana ny tempoly, tamin’ny volana faharoa tamin’ny taona faharoa (Ziva na Iara, Aprily-Mey 536 T.K.). (Ezr 3:8) Fantatr’i Zerobabela sy Jesoa ary ny lohan’ny fianakaviambe fa ratsy saina ireo tsy Jiosy nangataka ny handray anjara koa, ka hoy izy ireo: “Tsy manan-jo hiaraka aminay hanorina trano ho an’Andriamanitray ianareo. Izahay ihany no hanorina ho an’i Jehovah Andriamanitry ny Israely, araka ny nandidian’i Kyrosy mpanjakan’i Persa.”—Ezr 4:1-3.
Mbola nanakivy an’ireo mpanorina ny tempoly anefa ireo tsy Jiosy. Farany, nahazo didy ofisialy nandrara an’ilay asa izy ireo (522 T.K.). Nentanin-dry Hagay sy Zakaria mpaminany anefa i Zerobabela sy Jesoa (Josoa) ka sahy nanohy indray ilay asa, roa taona taorian’izay. (Ezr 4:23, 24; 5:1, 2; Hg 1:1, 12, 14; Za 1:1) Avy eo dia hita tao amin’ny antontan-taratasin’ny Persianina ny didy nanome alalana azy ireo hanorina. (Ezr 6:1-12) Nandrisika sy nampahery an’i Zerobabela foana ry Hagay sy Zakaria, sady nanome toky fa nankasitrahan’Andriamanitra izy. (Hg 2:2-4, 21-23; Za 4:6-10) Farany, vita ilay tempoly (515 T.K.). (Ezr 6:13-15) Nomena izay nilainy koa ny Levita, ary nahazo ny anjarany “araka izay nilaina isan’andro” ny mpihira sy mpiandry vavahady, tamin’ny andron’i Zerobabela.—Ne 12:47.