MPAMPIASA PILOTRA
Olona mitifitra amin’ny pilotra. Tady lavalava aforitra roa ny pilotra, ary asiana vato (na zavatra hafa) eo afovoany. Ahodinkodina mafy ilay pilotra, ary avotsotra ny ilany ka lasa misidina be ilay vato.
Ampahany lehibe tamin’ny tafika fahiny ny mpampiasa pilotra. Nanana “mpampiasa pilotra” voafantina 700 ny fokon’i Benjamina, “ary ny vato nalefany dia tsy nisy nivaona na dia hoatran’ny singam-bolo iray aza.” (Mpts 20:15, 16) Mpampiasa pilotra kalazalahy ny Keretita sy Peletita miaramilan’i Davida, hoy ny Targoma. Ampahany lehibe tamin’ny tafik’i Ozia Mpanjaka koa ny mpampiasa pilotra. (2Ta 26:13, 14) Nanana mpampiasa pilotra ny tafik’i Sankeriba Asyrianina (araka ny asehon’ny sary eo amin’ny tsangambato), sy ny tafik’i Ejipta, Syria, Persa, Sisila, Roma (anisan’ny miaramila auxilia) ary firenen-kafa. Mbola nisy Jiosy mpampiasa pilotra tamin’ny taonjato voalohany, ary niady tamin’ny tafika romanina izy ireo, hoy i Josèphe.—Rakitry ny Ela Jiosy, XVII, 259 (x, 2); Ny Adin’ny Jiosy, II, 422, 423 (xvii, 5); IV, 14, 15 (i, 3).
Tamin’ireo miaramila nandeha an-tongotra fahiny dia andiany iray monja ny mpampiasa pilotra, fa nisy koa mpandefa zana-tsipìka, sy mpitan-defona vitsivitsy. Teo amin’ny vodilaharana ny mpampiasa pilotra, nefa nasaina nankeo aloha rehefa hiady na hanakana fahavalo, ary nomen’ny namany lalana izy ireo. Nitifitra avy tany aoriana koa anefa izy ireo indraindray, ka nisidina teo ambonin’ny mpitan-defona ny vato. Tena nilaina ny mpampiasa pilotra rehefa nanafika tanàna nisy manda, satria nety ho voany ny fahavalo teny ambony manda na izay nokendreny tao an-tanàna. (2Mp 3:25) Afaka nitifitra avy teo ambony fitaovana fanaovana fahirano sy tilikambo fanafihana ny mpampiasa pilotra tatỳ aoriana.
Afaka namely lavitra ny mpampiasa pilotra, tsy hoatran’ny mpitan-tsabatra na mpitan-defona nanao akanjo mifono vy, satria tonga tany amin’ny 122 m, hono, ny vato nalefany, na lavitra kokoa raha firamainty boribory no nampiasainy.
Nampiasa pilotra i Davida. Lasa nahay nampiasa pilotra ny olona iray rehefa nampiasa foana. Toy izany, ohatra, ny zazalahy mpiandry ondry izay niaro foana ny ondry tamin’ny bibidia mpiremby. Zazalahy mpiandry ondry i Davida rehefa hiady tamin’i Goliata, ka naleony nitondra pilotra toy izay ny akanjo mifono vy mavesatra fanaovan’i Saoly. Ny finoana an’i Jehovah sy ny hery nomeny anefa no tena nilain’i Davida, satria tsy noho ny fitaovam-piadiana arifomba na hakingana no nandreseny fa noho ny fanampian’i Jehovah. Hoy i Davida tamin’i Goliata: ‘Izaho manatona anao amin’ny anaran’i Jehovah Tompon’ny tafika, izay nohantsinao. ... Ho fantatry ny fiangonana manontolo eto fa tsy sabatra na lefona no amonjen’i Jehovah, satria an’i Jehovah ny ady.’ Nilentika teo an-tampon-kandrin’i Goliata ny vato iray nalefan’i Davida, satria notarihin’i Jehovah sy nataony nisidina mafy. Nianjera i Goliata ka ny sabany ihany no ‘namonoan’i Davida azy ho faty tanteraka.’—1Sa 17:38-51.