SOKOTA
(Sôkôta) [Trano Rantsankazo].
1. Toerana nanorenan’i Jakoba trano sy trano rantsankazo ho an’ny biby fiompiny, taorian’ny nihaonany tamin’i Esao. Nantsoiny hoe Sokota àry ilay toerana. (Ge 33:16, 17) Efa niala tao izy vao nolazaina fa nijanona tao Sekema, “tany Kanana.” Tsy tany Kanana àry no nisy an’i Sokota.—Ge 33:18.
Misy andinin-teny hafa koa miresaka an’i Sokota, any atsinanan’ny Reniranon’i Jordana, ary toa ilay voalaza etsy aloha ihany izy io. Iray tamin’ireo tanàna lovan’ny fokon’i Gada tany atsinanan’i Jordana, ohatra, izy io. (Js 13:24, 25, 27) Niampita an’i Jordana i Gideona, tamin’izy nanenjika an’ireo sisa tavela tamin’ny tafiky ny Midianina. Tonga tao Sokota izy ary nangataka sakafo ho an’ny tafiny, nefa tsy nety nanome ny andriana tao. Tsy nety nanome hanina koa ny lehilahy tao Penoela, tanàna teo akaiky teo. Rehefa niverina i Gideona, dia azony ny anaran’ireo 77 lahy, andriana sy anti-panahy tao Sokota (asehon’izany fa tanàna lehibe izy io). Nofaiziny izy ireo satria tsy nety nanampy azy tamin’ny ady nasain’Andriamanitra nataony. (Mpts 8:4-16) Teo anelanelan’i Sokota sy Zaretana, teo amin’ny Faritr’i Jordana, i Solomona no nandrendrika an’ireo fitaovana varahina tamin’izy nanorina ny tempoly.—1Mp 7:46.
Maro àry no milaza an’i Sokota ho toerana iray any Tell Deir ʽAlla (Sukkot ankehitriny) na any akaikin’izy io. Tokotokony ho 5 km any atsinanan’ny Reniranon’i Jordana i Tell Deir ʽAlla, ary any avaratra kelin’ny toerana ipoiran’i Jaboka avy any amin’ireo havoana. Any akaiky any no misy an’ilay toerana antsoin’ny Arabo hoe Tell el-Eksas. Midika hoe Sokota izy io amin’ny teny hebreo ka mbola ahitana ilay anarana fahiny. Tazana tsara avy eo Tell Deir ʽAlla ny lemaka mahavokatra iray, izay mety ho ilay “lemaka ivan’i Sokota” resahin’ny Salamo 60:6; 108:7.
2. Toerana voalohany nijanonan’ny Israelita tamin’izy ireo ho any amin’ny Ranomasina Mena. (Ek 12:37) Tsy fantatra ny nisy an’i Sokota, satria samy tsy fantatra na ny nisy an’i Ramesesa, toerana niaingan’ny Israelita, na ny nisy an’i Etama, toerana manaraka nitobian’izy ireo. (Ek 13:20) Ny hany azo lazaina, dia lalana iray andro eo ho eo (32 ka hatramin’ny 48 km) avy eo amin’ny Tany Efitr’i Etama i Sokota. Voalaza fa tany efitra lavalava manaraka ny sisiny avaratrandrefan’ny Saikinosin’i Sinay ny Tany Efitr’i Etama.