TOMASY

(Tomàsy) [avy amin’ny teny aram. midika hoe “Kambana”].

Apostolin’i Jesosy Kristy, ary nantsoina hoe “Ikambana” na Didymo. (Mt 10:3; Mr 3:18; Lk 6:15; Jn 11:16, Prot.) Somary maimaika hiteny izy ka tonga dia lazainy izay tsapany na izay mampisalasala azy. Fa rehefa afaka kosa ny fisalasalany ka lasa nino izy, dia tsy niahotra koa izy hilaza an’izay ninoany.

Nitaona an’ireo mpianany hiverina tany Jodia i Jesosy, mba hahafahany hanangana an’i Lazarosy tamin’ny maty. Hoy i Tomasy tamin’ireo mpianatra hafa: “Andao koa isika handeha, mba hiara-maty aminy.” (Jn 11:16) Nitady hitora-bato an’i Jesosy ny Jodianina tsy ela talohan’izay (Jn 11:7, 8), ka angamba i Tomasy te hitaona an’ireo mpianatra mba hiaraka tamin’i Jesosy, na dia mety ho faty toa an’i Lazarosy aza izy ireo, na hiara-maty amin’i Jesosy.

Nisalasala i Tomasy rehefa nilaza i Jesosy fa handeha hanomana toerana ho an’ireo apostoly. Hoy izy: “Tompo ô, tsy fantatray ange izay alehanao e! Ahoana moa no ahafantaranay ny lalana?” (Jn 14:2-6) Nisalasala koa izy rehefa nandre hoe natsangana tamin’ny maty i Jesosy. Hoy izy: “Raha tsy hitako ny mariky ny fantsika eo amin’ny tanany ka ataoko eo amin’ilay marika ny rantsantanako, ary ataoko eo amin’ny takibany ny tanako, dia tsy hino mihitsy aho.” Nahita an’i Jesosy tokoa i Tomasy, valo andro tatỳ aoriana, rehefa niseho tamin’ny mpianany indray i Jesosy. Tsy voalaza anefa raha tena nitsapa an’ireo ratra tokoa i Tomasy tamin’izay, na tsia. Na izany aza, dia nino izy ka niteny hoe: “Ry Tompoko sy Andriamanitro!” Nanitsy moramora an’i Tomasy i Kristy avy eo hoe: “Sambatra izay tsy mahita nefa mino.”​—Jn 20:24-29.