FAMPIJALIANA
Miseho in-20 mahery ny teny grika hoe basanizô (sy ny teny iray tarika aminy), ao amin’ny Soratra Grika Kristianina. “Sedraina amin’ny vato fisedrana metaly [basanôs]” no tena dikan’izy io, fa nanjary nilazana hoe “mampijalijaly mba hamotopotorana na hanadihadiana” koa izy io. Misy mpanao diksionera manazava fa ‘mampanaintaina mafy mba hanorisorenana; ampijalina, ampahorina’ no heviny ao amin’ny Soratra Grika.—Mt 8:29; Lk 8:28; Ap 12:2.
Ireto ny sasany amin’ny andininy misy hoe basanizô ao amin’ny Baiboly. Voalaza, ohatra, fa ‘nijaly mafy’ (TV) na ‘nanaintaina mafy’ (CT [1960]) ny mpanompo iray nalemy. (Mt 8:6; ampit. 4:24.) Voalaza koa fa “nijaly mafy tokoa tao am-pony” (DIEM) na “sorena mafy” (Mo, RS) i Lota, satria nanao ny tsy ara-dalàna ireo mponin’i Sodoma. (2Pe 2:8) Ampiasaina mihitsy aza io teny grika io mba hilazana sambo atopatopan’ny onja, ka tsy afa-mandroso.—Mt 14:24; Mr 6:48.
Hita ao amin’ny Matio 18:34 ilay teny grika hoe basanistes, ary nadika hoe “mpiambina ny fonja” (TV; ampit. Mt 18:30) na “mpampijaly.” (Prot., Kat., JM, FFBF) Ampijalijalina ny voafonja, indraindray, rehefa misy fanazavana tiana ho azo avy aminy (ampit. As 22:24, 29, tsy basanizô anefa no ampiasaina ao). Nanjary nampiasaina tamin’ny mpiambina fonja àry ny basanistes. Hoy Ny Rakipahalalana Ara-baiboly Iraisam-pirenena momba ny fampiasana ny basanistes ao amin’ny Matio 18:34: ‘Azo inoana fa ny fanagadrana dia efa “fampijaliana.” Mpiambina fonja fotsiny àry no dikan’ilay hoe “mpampijaly.”’ (Nataon’i J. Orr, 1960, Boky Faha-5, p. 2999) Araka izany, dia midika hoe hatao tsy afaka manao na inona na inona ilay hoe “hampijalina andro aman’alina mandrakizay mandrakizay” ao amin’ny Apokalypsy 20:10. Azo lazaina hoe ‘hampijalina’ koa izy io, raha ny Matio 8:29 sy Lioka 8:31 no jerena. Fitantarana mitovy ihany mantsy ireo.—Jereo FARIHY AFO.
Misy mpivaofy teny maka andininy ahitana an’ilay teny hoe “fampijaliana”, mba hanamarinana hoe ampijalina mandrakizay ao anaty afo ny ratsy fanahy. Voalaza tetsy aloha anefa fa tsy izany no dikan’ny Apokalypsy 20:10, ary azo porofoina ao amin’ny Baiboly izany. Asehon’ny andininy faha-14, ohatra, fa “ny fahafatesana faharoa” ilay “farihy afo” voalaza fa misy fampijaliana. Tsy fijalijaliana ara-bakiteny koa no tian’i Jesosy holazaina rehefa nilaza izy fa “nijalijaly” ilay lehilahy mpanankarena. (Lioka 16:23, 28) (Jereo LAZAROSY [No. 2].) Tsy tena nisy mantsy io lehilahy io ary tsy tena nitranga ilay zavatra noresahin’i Jesosy, fa fanoharana fotsiny. Misy andininy maro hafa koa ao amin’ny Apokalypsy ampiasana an’ilay hoe “fampijaliana”, nefa mazava amin’ny teny manodidina fa manana heviny an’ohatra izy ireny.—Ap 9:5; 11:10; 18:7, 10.