Fanontanian’ny Mpamaky
● Moa ve ny Kristianina iray nanolo-tena sy vita batisa mety ho tonga mpanao ady totohondry ny anton-draharahany ka mbola hoheverin’ny fiangonany tsara ihany?
Ny Kristianina izay ho tonga mpanao ady totohondry ny anton-draharahany dia hanohitra ny torohevitr’Andriamanitra. Aoka hojerentsika ny sasantsasany amin’ireny torohevitra ireny.
Ny Soratra Masina dia mampiseho mazava fa ny Kristianina nanolo-tena dia tokony hamoa ny vokatry ny fanahy masin’Andriamanitra, izany hoe ny fitiavana, ny fifaliana, ny fiadanana, ny fahari-po, ny fahamoram-panahy, ny hatsaran-toetra, ny finoana, ny fahalemem-panahy sy ny fahononam-po, ny finoana, na fifehezan-tena. (Gal. 5:22, 23) Ny fanaovana ady totohondry ho anton-draharaha dia fandavana an’ireo toetra tsara rehetra ireo. Milaza amintsika ny Baiboly mba ‘hihavana amin’ny olona rehetra’ sy tsy hiady, fa ho “malemy fanahy amin’ny olona rehetra.” (Rom. 12:18; 2 Tim. 2:24) Izao koa no vakintsika ao amin’ny Jakoba 3:18: “Ary ny vokatry ny fahamarinana dia afafy amin’ny fihavanana ho an’izay mampandroso ny fihavanana.” Tokony ho ‘tia ny namantsika tahaka ny tenantsika isika’; ary anefa ny fitiavana tsy manisy “ratsy” ny namana.—Romanina 13:9, 10.
Tsy azo heverina ho fanaovana fanatanjahan-tena tsy mampaninona ny fanaovana ady totohondry ho anton-draharaha. Fantatry ny olona rehetra fa ireo mpanao ady totohondry miakatra eo amin’ny toerana fanaovana izany dia tsy maniry afa-tsy zavatra iray ihany: ny handratra ny mpifanohitra aminy. Amin’izay fotoana izay aza izy dia mety hahatsiaro haniry hahafaty azy. Tsy miafina amin’ny olona rehetra izany toe-tsaina izany, araka ny matetika porofoin’ny fihetsiky ny mpijery izay tsy mitsahatra ny miantsoantso hoe: “Vonoy io! Vonoy io!”
Tsy mahagaga àry ny mamaky ao amin’ny filazam-baovao fa ny mpanao ady totohondry iray dia voavono ho faty tamin’ny fifaninanana. Izay manao ady totohondry dia mety ho tonga mpamono olona foana; nosoratan’ny apostoly Jaona anefa fa “tsy mba misy mpamono olona manana fiainana mandrakizay.” (1 Jaona 3:15)