“Miasà hatrany ho amin’ny famonjena anareo”
“Miasà hatrany ho amin’ny famonjena anareo amin’ny tahotra sy ny hovitra.”—Filipiana 2:12, MN.
1. a) Inona no midera an’i Jehovah amin’ny fomba mangina? Ahoana no hetezan’izany? b) Iza koa moa no asaina hidera azy?
MIDERA azy ny asan’i Jehovah. Nanoratra toy izao ny mpanao salamo iray: “Miderà Azy, ry masoandro amam-bolana; miderà Azy, ry kintana mazava rehetra.” Ireny asa ireny, na dia moana aza, dia mihira fiderana ny Mpamorona, sahala amin’ny tendrombohitra sy ny havoana, ny zavamaniry sy ny biby, ny vorona sy ny zavatra mikisaka (Salamo 148:3, 9, 10; 19:1-4). Nahoana no lazaina fa ireny asan’Andriamanitra mangina ireny dia afaka midera azy? Satria ny zavatra natao rehetra dia taratr’ilay nanao azy. Raha nampiseho ny Baiboly fa toy izany tokoa no hita amin’ny asan’i Jehovah, dia izao no lazainy: “Fa ny fombany tsy hita, dia ny heriny mandrakizay sy ny mah’Andriamanitra Azy, dia miseho hatramin’ny nanaovana izao tontolo izao, fa fantatra amin’ny zavatra nataony”. (Romana 1:20). Raha ny asan’Andriamanitra tsy manam-peo aza tsy maintsy midera azy, dia vao mainka tokony hanao izany ireo zavaboary nomeny fahafahana hiteny! Noho izany no mahatonga ny Salamo 146 ka hatramin’ny 150 hanomboka sy hifarana amin’ny antso hoe “Haleloia [Derao Jah, MN]!”
2. Amin’ny asa inona moa no ampisehoantsika fa kristiana isika?
2 Toy ny asan’i Jehovah taratry ny maha-izy azy, ny asantsika dia taratry ny maha-isika antsika. Moa ve izany mampiharihary fa mikatsaka harena isika sa, mifanohitra amin’izany kosa, fa ny faniriantsika dia ny hidera an’i Jehovah? Ny asa voalohany iantsorohan’ny kristiana dia ny fanatanterahana ny tenin’i Jesosy manao hoe: “Ary hotorina amin’izao tontolo izao ity filazantsaran’ny [vaovao tsaran’ny, “MN”] fanjakana ity ho vavolombelona amin’ny firenena rehetra, dia vao ho tonga ny farany.” Talohan’ny handaozana an’ireo mpianany, dia izao koa no nolazain’i Jesosy tamin’izy ireo: “Mandehana hianareo, dia ataovy mpianatra ny firenena rehetra, manao batisa azy ho amin’ny anaran’ny Ray sy ny Zanaka ary ny Fanahy Masina sady mampianatra azy hitandrina izay rehetra nandidiako anareo.” (Matio 24:14; 28:19, 20). Tokony ‘hanao fanambarana feno isan-trano’ isika ka hanao asa tsara amin’io lafiny io. Amin’izany ihany isika no ho afaka hanana ny fankasitrahan’i Jehovah sy Jesosy Kristy Mpanjaka, araka ny vaosoratra hoe: “Mahita olona mailaka amin’ny raharahany va hianao? Eo anatrehan’ny mpanjaka no hitsanganany.” — Asa. 20:20, 21; Ohabolana 22:29.
3. Afaka mandray soa amin’ny fampiofanana inona moa isika? Nahoana moa isika no tokony ho tonga kinga amin’ny asa nankinin’Andriamanitra tamintsika?
3 Nomen’Andriamanitra antsika ny Baiboly mba hitondra ho antsika ny fianarana sy ny fiofanana ilaintsika, “mba ho tanteraka ny olon’Andriamanitra, ho vonona tsara ho amin’ny asa tsara rehetra”. Amin’ny alalan’ny fianarana miaraka sy manokana, amin’ny famonjena tsy tapaka an’ireo fivorian’ny kongregasiona sy amin’ny fandraisantsika anjara amin’ireo fandaharam-pampiofanana isan-karazany, dia hampiharintsika izao torohevitr’i Paoly izao: “Mazotoa manolotra ny tenanao amin’Andriamanitra ho olona voazaha toetra, dia mpiasa tsy mahazo henatra, mizara tsara ny teny fahamarinana.” (II Timoty 3:17; 2:15). Satana, andriamanitry ny fandehan-javatra ratsy ankehitriny, dia nandrary lainga ara-pivavahana goavana ka namelatra izany toy ny fisalobonana teo amin’ireo firenena mba tsy hahafahan’ny tsy mino mahita ny vaovao tsaran’ny Fanjakan’i Kristy. Ny Tenin’i Jehovah kosa anefa dia toy ny sabatra roa lela, ary ny adidin’ny Vavolombelon’i Jehovah dia ny manazatra ny tenany ho amin’ny fampiasana an’io sabatra io mba hahafahana mandrotidrotika ny fanaronana ataon’i Satana sy hamelana ny fahazavana hamirapiratra ao am-po sy ao an-tsaina marin’ny “ondry rehetra, lehilahy sy vehivavy ary zanaka. — II Korintiana 4:3, 4.
Fanati-piderana mahafinaritra
4. Ampitahain’ny Baiboly amin’inona moa ny fiderantsika? Fanaovana tsirambina inona moa no melohin’ny Malakia 1:6-8?
4 Ny Baiboly dia mampitaha ny fiderantsika an’i Jehovah amin’ny fanatitra notakin’ny Lalàn’i Mosesy. Izao no vakintsika: “Koa aoka isika hanatitra fanati-piderana amin’ny alalany ho an’Andriamanitra mandrakariva, dia ny vokatry ny molotra izay manaiky ny anarany.” Ny tenintsika koa dia oharina amin’ny “vantotr’ombilahin’ny molotsika”. (Hebreo 13:15; Hosea 14:2, MN.) Teo ambanin’ny Lalàna, ireo fanatitra dia tokony tsy hisy loto mihitsy, ary rehefa nanao tsirambina an’io fepetra io ireo mpisorona, dia niteny azy ireo toy izao Jehovah:
“Ny zanaka manaja ny rainy, ary ny mpanompo ny tompony; koa raha Ray Aho, aiza àry izay hajako? Ary raha Tompo Aho, aiza izay tahotra Ahy? Hoy Jehovah, Tompon’ny maro, aminareo, ry mpisorona, izay manamavo ny anarako, nefa manao hoe: Amin’inona no anamavoanay ny anaranao? Amin’ny fitondrana hanina voaloto ho eo amin’ny alitarako. Nefa hianareo manao hoe: Amin’inona no andotoanay Anao? Amin’ny fanaovanareo hoe: ny latabatr’i Jehovah dia fanaizambazimba. Ary raha jamba no entinareo hovonoina hatao fanatitra, — tsy ratsy hoe izany! Ary raha mandringa sy marary no entinareo, — tsy ratsy hoe izany! Atero ho an’ny governora manapaka anao ange izany, — moa hahazo sitraka na fitia aminy va hianao?”
5. Ahoana moa no azontsika itandremana mba hanolorana fanati-piderana tsy misy kilema?
5 Raha mbola miankina amintsika koa izany, moa ve ny fanatitra atolotsika amin’izao andro izao, raha lazaina amin’ny teny hafa, ny “vantotr’ombilahin’ny molotsika” sy ny ‘vokatry ny molotsika’ tsy misy loto mihitsy? Moa ve isika niezaka, tamin’ny fianarana sy tamin’ny fampitomboana ny fahaizantsika, nanolotra fanati-piderana mahafinaritra araka izay azo atao? Moa ve isika mikatsaka sy mandanjalanja ny teny fahamarinana mba hampisehoana izany amin’ny olona ao amin’ny faritanintsika amin’ny fomba mahafinaritra? Tadidio izao: “Ary koa, satria hendry Mpitoriteny, dia mampianatra ny olona fahalalana izy; eny, nandinika sy nieritreritra ary nandahatra ohabolana maro izy. Mpitoriteny nitady hahita teny mahafinaritra; ary izay mahitsy no voasorany, dia tenin’ny fahamarinana.” — Mpitoriteny 12:9, 10.
6. Amin’ny fomba ahoana no azontsika anampiana ny mpiara-belona amintsika hanaiky ny hafatra momba ilay Fanjakana?
6 Sarotra amin’ny mpiara-belona amintsika ny miaiky fa diso hevitra izy ka mila ny hiova hevitr, indrindra fa amin’ny lafiny toy ny fivavahana andraisan’ny fihetseham-po anjara lehibe. Moa ve isika manandrana manao izay hampahamora kokoa ny adidiny? Mipetraka eo amin’ny toerany ve isika, toy ny nataon’ny apostoly Paoly tamin’ny androny? Izao no nosoratany: “Tamin’ny Jiosy, dia tonga toy ny Jiosy aho, mba hahazoako ny Jiosy; tamin’izay ambanin’ny lalàna, dia tonga toy izay ambanin’ny lalàna aho, na dia tsy ambanin’ny lalàna aza aho, mba hahazoako izay ambanin’ny lalàna, tamin’izay tsy manana lalàna, dia toy izay tsy manana lalàna aho (kanefa tsy mba olona tsy manana lalàna amin’Andriamanitra aho, fa ambanin’ny lalàn’i Kristy), mba hahazoako izay manana lalàna; tamin’ny malemy dia tonga malemy aho, mba hahazoako ny malemy; efa tonga zavatra rehetra aho amin’ny olona rehetra, mba hamonjeko ny sasany na iza na iza. Ary izany rehetra izany dia ataoko noho ny filazantsara mba ho tonga mpiombona aminy aho.” — I Korintiana 9:20-23.
7. Ahoana no mety hahatongavantsika hahay hampiaiky kokoa eo amin’ny asa fitoriantsika?
7 Moa ve ny resaka ataontsika voamariky ny fahaiza-manavaka sy ny hatsaram-po? Mitady izay hanasitranana ve izy? Izao no lazain’ny Baiboly: “Izay hendry am-po dia lazaina hoe manan-tsaina, ary ny hamamian’ny molotra mampandroso fahendrena. Toho-tantely ny teny mahafinaritra, ka sady mamin’ny fanahy no mahatsara ny taolana.” Moa ve isika mianatra noho ny fikendrena ny hanana fahiratan-tsaina rehefa manao fanambarana ilay Fanjakana sy mba hahazoana hery fampiaikena? Izao koa no vakintsika: “Ny fon’ny hendry mahahendry ny vavany sady manampy fahendrena [hery fampiaikena, “MN”] eo amin’ny molony.” (Ohabolana 16:21, 24, 23). Fantatrao fa ny sira dia manome tsiro ny sakafo izay, raha tsy misy azy dia hatsatso na tsy hisy tsirony. Nampiasa an’io sary io i Paoly mba hampisehoana fa ny sakafo ara-panahy omentsika ny hafa dia tokony ho tsara tsiro koa; izao no nosoratany: “Aoka ny fiteninareo ho amin’ny fahasoavana mandrakariva, ho mamy sira, mba ho fantatrareo izay tokony havalinareo ny olona rehetra.” — Kolosiana 4:6.
Ravaho asa tsara ny fampianaranao
8. Inona moa no tsy maintsy ataontsika raha tsy tiantsika ny homelohina noho ny fihatsarambelatsihy?
8 Ankoatra ny tokony hitoriantsika ny vaovao tsara, dia ilaina tanteraka ny hanaovana asa mampiseho fa mampihatra izay torintsika isika, raha tsy izany dia ho meloka ho mpihatsaravelatsihy isika. Nahatsapa tanteraka izany adidy izany ny apostoly Paoly. Niampanga ny mpampianatra jiosy sasany tamin’ny androny ho diso tamin’io lafiny io izy ka nanoratra toy izao: “Ka moa hianao izay mampianatra ny sasany, tsy mba mampianatra ny tenanao koa va? Hianao izay mitory hoe: Aza mangalatra, mba mangalatra ihany va hianao? Hianao izay mametaveta [mampiseho fa mahatsiravina, “MN”] ny sampy, mba mandroba tempoly ihany va hianao? Hianao izay manao ny lalàna ho reharehanao, mba manala voninahitra an’Andriamanitra ihany va hianao amin’ny andikanao ny lalàna?” (Romana 2:21-23). Noho ny fahatsapan’i Paoly fa nisetra loza toy izany koa ny tenany, dia izao koa no nosoratany: “Asiako mafy ny tenako ho mangana ka andevoziko, fandrao na dia efa nitory tamin’ny sasany aza aho, dia holavina kosa ny tenako.” — I Korintiana 9:27.
9. Fanaporofoan-kevitra inona avy no mandrava ny hevi-diso hoe “rehefa voavonjy dia ho mandrakizay?
9 Mifanohitra amin’ny hevitry ny mpitondra fivavahana maro amin’izao androntsika izao àry dia tsy nieritreritra i Paoly hoe “rehefa voavonjy ny tena, dia voavonjy mandrakizay”. Rehefa nanaiky an’i Jesosy ho Mpamonjy antsika sy ho Mpanavotra antsika Jesosy, ka nanokana ny fiainantsika ho an’i Jehovah Andriamanitra, dia tsy nanao afa-tsy ny niditra ho eo amin’ny lalan’ny famonjena — tsy nahatratra ny famonjena isika. Izany no antony nanomezan’i Paoly izao torohevitra izao: “Miasà hatrany ho amin’ny famonjena anareo amin’ny tahotra sy ny hovitra.” (Filipiana 2:12, “MN”). Inona tokoa no hilana ny ‘hiasana hatrany’ sy hanaovana izany “amin’ny tahotra sy ny hovitra” raha ‘voavonjy ho mandrakizay’ ny tena? Ny sasany mety hihataka, indraindray aza tonga hatramin’ny tsy fahafahana hiverina intsony ho amin’ny fibebahana, “satria manombo ny Zanak’Andriamanitra indray amin’ny hazo fijaliana”. Nampitandrina ny kristiana i Jesosy fa mety hisy olon-kafa ’haka ny satroboninahy’. Rehefa niresaka ny amin’ny “fifaranan’ny fandehan-javatra” izy dia izao koa no nambarany: “Fa izay maharitra hatramin’ny farany no hovonjena.” (Hebreo 6:4-6; Apokalypsy 3:11; Matio 24:3, 13). Ny zava-dehibe dia ny toerana tanantsika amin’izao fotoana izao eo anatrehan’Andriamanitra fa tsy ny toerana tsara na ratsy notanantsika taloha (Ezekiela 33:12-16). Noho izany dia aoka isika hanohy hiasa amin’ny fitoriana ilay Fanjakana, hitondra tena tsara sy hanao izany rehetra izany amin’ny tahotra mahasoa ny ota.
10. Ahoana no tokony hanaovantsika izay hampahamendrika fampianarantsika? Inona no ho vokany?
10 Namporisika ny kristiana i Paoly mba ‘hahonon-tena, ho hendry, hitondra tena toy izay mendrika ny olona masina, tsy ho mpanendrikendrika na andevozin’ny divay be, haneho fitiavana eo anivon’ny fianakaviana, ho madio, hanao resaka mahasoa sy ho mpiasa tsara’. Izany rehetra izany dia noho ny fikendrena inona? “Mba tsy hitenenan-dratsy ny Tenin’Andriamanitra” sy “mba hampahamendrika ny fampianaran’Andriamanitra, Mpamonjy antsika”. Raha ataony koa izay hampahamendrika ny fitoriany amin’ny fitondrantena tsara, dia ho tonga “ohatra amin’ny asa tsara” ny Vavolombelon’i Jehovah. (Titosy 2:1-10.) Nanoratra toy izao ho an’i Timoty ny apostoly Paoly: “Anaro ny mpanan-karena amin’izao fiainana ankehitriny izao mba tsy hiavonavona, na hatoky ny harena miovaova, fa Andriamanitra, Izay manome antsika malalaka ny zavatra rehetra mba hifaliantsika, mba hanao soa, mba hanan-karena amin’ny asa tsara, hazoto manome sy mianatra, ka dia hihary fanorenana tsara ho an’ny tenany ho amin’ny andro ho avy, mba hihazonany ny tena fiainana.” — I Timoty 6:17-19.
11. Mahatonga antsika ho afaka hanatratra zava-kendrena lehibe inona moa ny fiainana ankehitriny, na dia vitsy sy misamboaravoara aza ny androntsika?
11 Tsy tena atao hoe miaina ny miaina tahaka ny ataon’izao tontolo izao ankehitriny. Nambaran’i Paoly fa ny olona “manaram-po amin’ny fahafinaretana dia maty fahavelony”. (I Timoty 5:6.) Ny fiainana ankehitriny anefa dia mahatonga antsika ho afaka hanatratra izao zava-kendrena tena lehibe izao: “Hanan-karena amin’ny asa tsara” ary ‘hihary fanorenana tsara ho an’ny tenantsika ho amin’ny andro ho avy, mba hihazonantsika ny tena fiainana’ eo ambany fiandrianan’ny Fanjakan’i Jehovah sy ny Kristiny. Na dia hanana izay rehetra mety homen’ny fiainana aza isika, dia tsy hisy antony ny fahavelomantsika raha tsy feno asa tsara. Vitsy ny andro eo amin’ny fiainana ankehitriny ary tsy mitondra ho antsika afa-tsy fanaintainana, alahelo, fijaliana, fahadisoam-panantenana, faharatsiana sy fahafatesana. Vitsy ireny andro ireny, nefa ampy ny isany mba hahafahantsika ho tonga manan-karena amin’ny asa tsara raha tsy diso aoriana loatra isika. Mitondra fifaliana sy fahafahampo, fiadanana, fianinana, ny fahatsiarovana ho manana fiainana misy zava-kendrena, ary koa ny fahasalamana ara-panahy sy ny fiainana mandrakizay.
Asa mampitony ho amin’ny famonjena
12. Inona moa no manasatra ny Vavolombelon’i Jehovah mahatoky iray? Mifamadika amin’izany, inona no mitondra fanamaivanana?
12 Na dia mety ho toa hafahafa tokoa aza izany amin’izao androntsika izao izay ahitana tsy firaikana sy fankahalana be dia be, dia manasatra ny Vavolombelon’i Jehovah tia miasa tsara ny tsy manambara ny Fanjakan’Andriamanitra. Fanamaivanana ny firesahana. Rehefa tapa-kevitra ny tsy hitory intsony i Jeremia, dia nandany ny taolany toy ny afo ny hafatra nentiny, hany ka izao no nambarany: “Sasatra ny niaritra aho ka tsy mahazaka.” (Jeremia 20:9). Eliho dia nahatsapa koa ny ilàna hiresaka fahamarinana tsy nolazainy hatramin’ny ela be. Hoy ny nambarany: “Fa feno teny ny foko; manery ahy ny fanahy (esprit) ato anatiko. Endrey! Ny ato anatiko dia efa tahaka ny divay izay tsy misy hiainana, efa ho triatra tahaka ny siny hoditra vaovao izy. Hiteny aho mba hisy hiainako tsara”. (Joba 32:18-20). Rehefa avy nanatontosa ny adidiny i Eliho dia nahatsiaro ho maivamaivana. Aoka hotadidiantsika fa nifaly Andriamanitra rehefa nahavita ny asa famoronany ary tamin’i Jesosy, ny fanompoana an’i Jehovah koa dia toy ny sakafo nampahatanjaka indray. Toy izany koa, ny asa fitoriana amin’izao andro izao dia mitondra fanamaivanana ho an’ny Vavolombelon’i Jehovah. ‘Elatra no iakarany tahaka ny voromahery’. — Isaia 40:31.
13. Inona no tokony hataontsika dieny izao? Ho an’iza izany no hahasoa? Amin’ny fomba ahoana?
13 Fotoana tsara dia tsara izao mba hianarana ny Tenin’Andriamanitra, ny Baiboly, mba tsy hanarahana intsony ny fanaon’izao fandehan-javatra ankehitriny izao ary mba hiovana amin’ny fanavaozana ny saintsika. Izao no vakintsika: “Aza tia izao tontolo izao, na izay zavatra eo amin’izao tontolo izao.” “Ary mandalo izao fiainana izao sy ny filany; fa izay manao ny sitrapon’Andriamanitra no maharitra mandrakizay.” (I Jaona 2:15, 17; Romana 12:2). Ataovy izay hahampy fitaovana mba hanatanjahana ny ory noho ny vaovao tsaran’ny Fanjakan’Andriamanitra. Ataovy izay hampahamendrika ny fampianaranao amin’ny famoazana ny vokatry ny fanahy eo amin’ny fiainanao: “Fitiavana, fifaliana, fiadanana, fahari-po, fahamoram-panahy, fanaovan-tsoa, fahamarinana [finoana, “MN”], fahalemem-panahy, fahononam-po”. (Galatiana 5:22, 23.) Ampio ireo manetry tena mba hanavao ny sainy sy hanankarena amin’ny asa tsara, mba hahafahana hiaina mandrakizay ao amin’ny paradisa an-tany (Salamo 37:11, 29). Sady manohy miasa ho amin’ny famonjena ny tenanao ianao no manampia azy ireny hiasa ho amin’ny azy.
14. a) Inona no fananarana ataon’Andriamanitra amintsika? Nahoana no mety izany amin’izao andro izao b) Inona no ho azontsika atao ary mety ho tonga karazan’olona manao ahoana isika raha mamaly izany fananarana izany?
14 Sarotra ny andro iainantsika, ary kely sisa ny fotoana tavela. Koa mandefa izao fananarana manaraka izao ho antsika Andriamanitra: “Mitoria ny teny, mazotoa, na amin’ny fotoana, na tsy amin’ny fotoana [amin’ny vanim-potoana sarotra, “MN”].” “Miorena tsara, aza miova, ary mahefà be mandrakariva amin’ny asan’ny Tompo, satria fantatrareo fa tsy foana tsy akory ny fikelezanareo aina ao amin’ny Tompo.” “Mazotoa, fa aza malaina, ary aoka hafana fo amin’ny fanompoana ny Tompo [Jehovah, “MN”].” (II Timoty 4:2; I Korintiana 15:58; Romana 12:11). Ampiharo ireo torohevitra isan-karazany ireo ary “miasà hatrany ho amin’ny famonjena anareo amin’ny tahotra sy ny hovitra (...) mba hahatongavana ho tsy hanan-tsiny sy hadio, dia zanak’Andriamanitra tsy misy kilema eo afovoan’ny taranaka ratsy fanahy sy miolakolaka, izay amirapiratanareo toy ny loharanom-pahazavana eo amin’izao tontolo izao, mifikitra amin’ny teny fiainana”. — Filipiana 2:12, 15, 16, “MN”.
◻ Amin’ny fomba ahoana no ideran’ny asan’i Jehovah azy?
◻ Inona moa no karazam-panatitra ankasitrahan’Andriamanitra amin’izao andro izao?
◻ Ahoana moa no azontsika anampiana ny mpiara-belona amintsika hanaiky ny hafatra momba ilay Fanjakana?
◻ Asa tsara inona moa no tokony hampahamendrika ny fampianarantsika?
◻ Asa inona no mitondra fanamaivanana ho an’ireo mpanompon’Andriamanitra?
◻ Fotoana tokony hanaovana inona izao?
[Teny notsongaina, pejy 18]
Moa ve isika mikatsaka sy mandanjalanja ny teny fahamarinana, mba hanolorana izany ny mponina ao amin’ny faritanintsika amin’ny fomba mahafinaritra?
[Teny notsongaina, pejy 19]
Ilaina tanteraka ny hanaovana asa mampiseho fa mampihatra izay torintsika isika, raha tsy izany dia ho meloka ho mpihatsaravelatsihy isika.
[Sary, pejy 17]
Ny asa mahatalanjon’i Jehovah dia ahitana taratry ny hoe karazana Andriamanitra manao ahoana izy. Toy izany koa, ny asantsika dia mampiharihary hoe karazana olona manao ahoana isika.
[Sary, pejy 20]
Mitondra fanamaivanana ny firesahana ny fahamarinana ao amin’ny Baiboly.