Tadidinao ve izany?

Efa novakinao tsara ve ireo nomerao faramparany amin’ny “Ny Tilikambo Fiambenana”? Raha izany no izy, dia hotsaroanao ireto hevitra mahaliana vitsivitsy ireto:

◻ Amin’ny ahoana moa ny vavaka faka tahaka no azo ampitahaina amin’ny vatosoa?

Sarobidy izy io. Manana famirapiratana mampiavaka azy ny tsirairay avy amin’ny lafiny madinika. Tsy veriny mihitsy ny vidiny.

◻ Raha naniasia lavitra ny kongregasiona ny mpanompon’i Jehovah vita fanoloran-tena iray, mety hahita indray ny fankasitrahan’Andriamanitra ve izy?

Eny, mety hitranga izany. Raha toa ilay nitsahatra tsy niaraka amin’ny kongregasiona ka mahatsiaro tena ho meloka ary tohina ny fony, dia mampiseho izany fa tsy lasa lavitra loatra izy ka tsy havelan’Andriamanitra heloka. Ireo fanoharana nataon’i Jesosy voasoratra ao amin’ny Lioka 15 dia mampiharihary hoe tena irin’Andriamanitra, ny Zanany, ny anjely ary ireo rahalahiny ara-panahy tokoa ny hitarika azy ireny ho amin’ny kongregasiona.

◻ Ahoana no tokony hakana sary an-tsaina ny andro fitsarana?

Haharitra arivo taona ny andro fitsarana, Jesosy Kristy (Isaia 11:3-5). Voalohany indrindra, ny olona dia hiara-hiasa amin’ny fanovana ny tany ho paradisa mba handraisana an’ireo maty hatsangana. Rehefa avy eo ireo dia hotsaraina araka izay hataony mandritra ny andro fitsarana fa tsy araka ny nataony taloha. Ireo izay hifidy ny hanompo an’i Jehovah dia hahazo ny fiainana mandrakizay. Izany rehetra izany dia mahatonga ny andro fitsarana ho andro fifaliana.

◻ Ahoana no mety hanampian’ireo torohevitra ao amin’ny Baiboly anao hiaro ny fahasalamanao?

Ny Tenin’Andriamanitra dia mirakitra torohevitra misy vokany, azo ampiharina amin’ny fahasalamana. Araka izany, ireo teny voalaza ao amin’ny Ohabolana 25:16, 27 dia mety hitsimbina antsika amin’ny loza ateraky ny fampiasana be loatra “vitamines”, “sels minéraux” na fanafody zavamaniry. Ny torohevitra ao amin’ny Filipiana 4:5 dia mety hiaro antsika amin’ny karazam-pitsaboana na famantarana aretina toa hafahafa, tsy voaseho fa mandaitra na toa mifanohitra amin’ireo fahalalana mahazatra. Ny fampitandremana voasoratra ao amin’ny Ohabolana 14:15 dia hampanalavitra antsika ny finoana filazana fotsiny. Farany, ny teny ao amin’ny Ohabolana 22:29a angamba dia hanosika ny kristiana hitady ny hevitry ny manam-pahaizana manokana maromaro.

◻ Inona no mety hanampy amin’izao andro izao hanaovana izay hahasambatra kokoa ny fianakaviana iray?

Mety hahita fahasambarana ny fianakaviana iray raha toa ny tsirairay amin’ny mpianakavy ka mianatra sy mampihatra ireo torohevitr’Andriamanitra hita ao amin’ny Baiboly.

◻ Ahoana ny fiheverana kristiana ny amin’ny fisamboram-bola?

Tsy manameloka ny fisamboram-bola akory ny Baiboly rehefa miharihary fa ilaina izany, nefa omeny izao fampitandremana manaraka izao: “Izay misambotra dia mpanompon’ny mampisambotra.” (Ohabolana 22:7). Koa afaka manontany tena toy izao ilay misambotra: ‘Tena ilaiko marina tokoa ve izany?’ Raha izany no izy, ny tarehin-javatra dia hanome ho an’ilay mpampisambotra sy ilay mpisambotra, fahafahana samy haneho ny fitiavany kristiana (I Korintiana 16:14).