‘Misaotra noho ny nampahiratana ny masonay’

TANY amin’ny lohasahan’i Alpa mahafinaritra any atsimon’i Frantsa dia niroborobo ny antokom-pivavahana iray fantatra tamin’ny anarana hoe “Vaudois” tamin’ny taonjato faha-12.a. Ireny olona tia fatratra ny fahamarinana ireny dia nino fa Tenin’Andriamanitra ny Baiboly ka niezaka mba hiaina nifanaraka tamin’ny fotopoto-pitsipiny. Nefa, noho izy ireny nitory izay nianarany avy amin’ny Soratra masina, dia nenjehina toy ny mpanohitra finoana izy. Be dia be no afa-nandositra ny fanenjehana tamin’ny fankanesana tany amin’ny tany hafa. Araka izany, ny sasany dia nialokaloka tany avaratr’i Italia ka mbola misy fikambanana “vaudoise” any mandraka ankehitriny. Araka ny fandehan’ny fotoana anefa, izany antokon’olona izany dia namela fampianarana sy fanao araka ny Baiboly maro narahin’ireo “Vaudois” voalohany.

Tsy ela izay, dia misy “Vaudois” vitsivitsy any Italia Avaratra miara-mianatra ny Baiboly amin’ny Vavolombelon’i Jehovah. Vao haingana, dia nandefa izao taratasy manaraka izao izy ho an’ny sampana italian’ny Fikambanana Watch Tower:

“Rentsika rehetra ny firesahana ny amin’ny fanenjehana niaretan’ireo [“Vaudois” voalohany] nandritra ny taonjato maro. Olom-bitsy kosa anefa no mahafantatra fa amin’izao fotoana izao izy ireny dia miverina amin’ny fanaon’ny mpanompo sampy sy tsy manaraka ny Baiboly intsony.

“Amin’izao andro izao izy ireny dia tsy fantatra intsony afa-tsy amin’ny marika mampiavaka azy (ny lakroa ‘huguenote’), marika ataony amin’ny rojo, na mba hampiharihary azy eo amin’ny fitaratry ny fiarakodiany, na mba hanantonana azy amin’ny tavoahangin-toaka na amin’ny fahatsiarovana hafa.

“Misaotra anareo izahay, ry rahalahy sy anabavy malala Vavolombelon’i Jehovah noho ny nandanianareo ora be dia be toy izany mba hampahiratana ny masonay sy mba hampidirana ny fahamarinana ao amin’ny sainay tsy mino (...). Sarobidy tokoa ny fotoana atokanareo ho anay, mihoatra lavitra noho ny vola. Ny fitiavana hafa (ilay tena fitiavana tsy misy fireharehana) asehonareo ny namanareo dia manondro anareo ho ny mpianatra lazalazain’i Jesosy ao amin’ny Jaona 13:35 sy ao amin’ny Matio 24:45. Ny fikarohana nataonay dia nampahafantatra anay fa taloha ny ‘Vaudois’ dia nampiasa ny anaran’Andriamanitra hoe Jehovah (...). Ankehitriny anefa dia avelany tsotra izao izany, na dia voalaza mazava ao amin’ny Asan’ny apostoly 15:14 aza fa Andriamanitra dia hanangona avy amin’ireo firenena ‘olona hankalazana ny anarany’. Amin’izao andro izao, dia hitanay tsara fa Vavolombelon’i Jehovah izany olona izany, izay hany mitondra an’io anarana lehibe io (Isaia 43:10-12). Koa ‘handeha hiaraka aminareo izahay; fa efa renay fa momba anareo Andriamanitra.’ (Zakaria 8:23).”

[Fanamarihana ambany pejy]