Misionera izay hanatontosa fanirahana avy amin’ny Kristy
TALOHA kelin’ny niakarany, Jesosy dia nanankina fanirahana iray tamin’ireo mpianany. Hoy izy tamin’izy ireo: “Koa mandehana hianareo, dia ataovy mpianatra ny firenena rehetra, manao batisa azy (...), sady mampianatra azy hitandrina izay rehetra nandidiako anareo..”—Matio 28:19, 20.
Tsapan’ny Vavolombelon’i Jehovah tanteraka izany. Noho izany no nanorenany tamin’ny 1943 ny Sekolin’i Gileada, izay natokana hampiofana misionera ho eo amin’ny laharana voalohany amin’ny asa fanaovana mpianatra maneran-tany. Nandray anjara lehibe tamin’ny fanatanterahana amin’ny andro ankehitriny ny tenin’i Jesosy io sekoly io.
Ny Sekolin’i Gileada dia any Etazonia, any Amerika, ary atao amin’ny fiteny anglisy ny fianarana ao. Hatreo, ny Vavolombelon’i Jehovah tsy miteny anglisy dia tsy maintsy hianatra io fiteny io mba hanarahana ny fianarana sy mba hahatongavana ho misionera, ary faly ery izy ireo nanao izany. Na dia izany aza, tamin’ny septambra 1981, ny kristiana miteny alemana dia faly nandre fa hosokafana any Wiesbaden, any Alemaina, ny fanampin’i Gileada iray. Hanao ny fianaran’i Gileada amin’ny teny alemaina io sekoly io.
Hatramin’izay, dia kilasy roa no nahazo diplaoma tao amin’io sekoly fanampiny io. Nahatratra ny zava-kendreny ve ireny fianarana ireny? Izany tokoa, raha heverina amin’ny fahasambarana sy ny hafanam-po nanjaka nandritra ny fanomezana diplaoma, izay natao tamin’ny 25 aprily 1982 ny an’ny kilasy faharoa.
Misionera mirehitra vaovao
Ny mpianatra telo amby roapolon’ity kilasy alemana faharoa ity dia avy any Luxembourg, Soisa, Pays-Bas ary Alemaina. Notarihina ho any Brésil, Equateur, Colombie, Paraguay, Surinam ary Zaïre izy ireo. Tao amin’ny taratasy iray, dia nasehon’izy ireo ny fankasitrahany ity sekoly fanampiny ity. “Izany dia nahatonga anay ho afaka hampifantoka ny sainay amin’ny sakafo ara-panahy naroso anay, hoy izy ireo, sady tsy nisetra zava-manahirana ny amin’ny fiteny.”
Ny mpanatrika 1140 ary koa ny mpianatra mihitsy dia nahafantatra fa ny asa lehibe nanirahana momba ny fanaovana mpianatra dia tsy nanary na dia kely akory aza tamin’ny halehibeny. Ary hatramin’izao, ny mpianatra dia tapa-kevitra ny hanatanteraka izany amin’ny fomba feno hatrany foana. Araka izany, ny mpivady iray dia nanambara hoe: “Nekenay tamim-pankasitrahana ny fanendrena anay ho any Brésil, ary antenainay fa ho afaka hampihatra izay rehetra azonay teto izahay.”
Talohan’ny handehanan’izy ireo ho any amin’ny faritaniny avy, ireo mpianatra dia nihaino torohevitra tsara dia tsara vitsivitsy nomena tamin’ny fotoana farany, avy amin’ny mpandahateny nanana fanandraman-javatra lava tamin’ny fanompoana kristiana. Ny iray tamin’izy ireo, Werner Rudtke, dia nanao fanamarihana sasany nifototra tamin’izao tenin’i Paoly manaraka izao, nataony ho an’ny Kolosiana: “Mifandefera”. (Kolosiana 3:13). Egon Peter izay nanatrika ny Sekolin’i Gileada tamin’ny 1952, dia niresaka ny amin’ny fitsapana nihatra tamin’ny mpianatra nandritra ny fianarana sy nampahatsiahy azy ireo fa i Jehovah mihitsy no nampihatra taminy fitsapana lehibe.—Salamo 7:9.
Dietrich Forster, iray tamin’ny mpampianatra, dia nampiomana azy ireo ny amin’ny mety hahitany fanoherana any amin’ny faritaniny. Tsy tokony hanambany tena ho eo amin’ny laharan’ny fahavalony anefa izy ireo, fa hanohy foana ‘handresy amin’ny soa ny ratsy’ kosa. (Romana 12:9-21.) Farany, Lothar Kaemmer, mpampianatra hafa izay misionera fahiny tany Venezuela, dia nampahatsiahy ny mpianatra, ny tsy tokony hanadinoany ny asa nanirahana azy. Ny apostoly Paoly tokoa mantsy dia nanambara hoe: “Ny miaramila manafika dia tsy mba misy maningon-tena amin’ny raharahan’izao fiainana izao”. (II Timoty 2:4). Tokony hampiseho fandavan-tena toy izany ny misionera kristiana.
Ny solontena sasany ao amin’ny fivavahana lazaina fa kristiana dia nanome heviny ratsy ny teny hoe “misionera”, noho ny fitsabahany amin’ny politika na noho ny fitondrantenany tsy mendrika. Ny hafa izay miasa any amin’ny sekoly sy hopitaly dia tsy isalasalana fa manatanteraka asa ilaina, nefa tsy manatanteraka ny asa nankinin’i Kristy izy ireo amin’izany. Ny kristiana nanolo-tena ho an’Andriamanitra dia faly tamin’ny fanaovana mpianatra sy ny fampianarana ny Baiboly. Raha ny amin’ireo vao nahazo diplaoma tamin’ny kilasy faharoan’ny fanampiny miteny aleman’i Gileada, izy ireo dia mifaly noho ny nahazoany nandray soa, tamin’ny fiteniny, tamin’ny fampianarana nomen’io sekoly tokana amin’ny karazany io. Hatramin’izao, dia ho tena misionera kristiana izy ireo.